Gjykata Kushtetuese

Prishtinë, më​​ 22 mars 2023

Nr. ref.:MK 2147/23

MENDIM KONKURRUES​​ 

i gjyqtarit​​ ​​ 

RADOMIR LABAN

në rastin nr.​​ KI36/22

Parashtrues​​ 

“MATKOS GROUP”​​ SH.P.K.

Vlerësim i kushtetutshmërisë së Aktgjykimit​​ ARJ.​​ nr. 116/2021​​ të​​ 

28 tetorit 2021 të Gjykatës Supreme të Kosovës​​ ​​ 

Duke shprehur që në fillim respektin dhe pajtimin tim me mendimin e shumicës së gjyqtarëve se në këtë rast​​ ka shkelje të nenit 31 [E Drejta për Gjykim të Drejtë dhe të Paanshëm] të Kushtetutës së Republikës së Kosovës (në tekstin e mëtejmë: Kushtetuta) në lidhje me nenin 6 (E drejta për një proces të rregullt) të Konventës Evropiane për Mbrojtjen e të Drejtave të Njeriut (në tekstin e mëtejmë: KEDNJ), unë si gjyqtar i Gjykatës Kushtetuese konsideroj se ka edhe një shkelje tjetër e të drejtave të njeriut të garantuara me Kushtetutë e kryer ndaj parashtruesit të kërkesës dhe që i referohet shkeljes së të drejtave të parashtruesit të kërkesës të garantuara me nenin 46 [Mbrojtja e Pronës] të Kushtetutës në lidhje me nenin 1 [Mbrojtja e pronës] të Protokollit nr. 1 të KEDNJ-së, të cilën do të përpiqem ta arsyetoj më poshtë.

Unë si gjyqtar pajtohem me gjendjen faktike siç është deklaruar dhe paraqitur në Aktgjykim dhe e pranoj të njëjtën gjendje faktike si të saktë. Gjithashtu, pajtohem me mënyrën se si janë parashtruar dhe paraqitur pretendimet e parashtruesit të kërkesës në Aktgjykim.​​ 

Për sa më sipër, dhe në pajtim me rregullat 62 dhe 63 të Rregullores së punës së Gjykatës Kushtetuese, mendimin tim konkurrues do ta paraqes me shkrim. Për të ndjekur sa më lehtë dhe më qartë arsyetimin e mendimit tim konkurrues, unë​​ (I)​​ do të përsëris pretendimet e parashtruesit të kërkesës në lidhje me shkeljet e pretenduara të të drejtave të parashtruesit të kërkesës të garantuara me nenin 46 [Mbrojtja e Pronës] të Kushtetutës në lidhje me nenin 1 [Mbrojtja e pronës] të Protokollit nr. 1 të KEDNJ-së;​​ (II)​​ do të vlerësoj aplikueshmërinë e nenit 46 [Mbrojtja e Pronës] të Kushtetutës dhe nenit 1 të Protokollit nr. 1 të KEDNJ-së;​​ (III)​​ do të paraqes përmbajtjen e nenit 46 [Mbrojtja e Pronës] të Kushtetutës dhe nenit 1 të​​ Protokollit nr. 1 të KEDNJ-së;​​ (IV)​​ do të arsyetoj parimet themelore të nenit 46 [Mbrojtja e Pronës] të Kushtetutës dhe nenit 1 të Protokollit nr. 1 të KEDNJ-së;​​ (V)​​ do të zbatoj parimet themelore të cekura më lart në rastin konkret;​​ (VI)​​ do të paraqes një përfundim në lidhje me shkeljet e pretenduara të të drejtave të parashtruesit të kërkesës të garantuara me nenin 46 [Mbrojtja e Pronës] të Kushtetutës në lidhje me nenin 1 [Mbrojtja e pronës] të Protokollit nr. 1 të KEDNJ-së.​​ 

• Pretendimet e parashtruesit të kërkesës në lidhje me shkeljet e pretenduara të të drejtave të parashtruesit të kërkesës të garantuara me nenin 46 [Mbrojtja e Pronës] të Kushtetutës në lidhje me nenin 1 [Mbrojtja e pronës] të Protokollit nr. 1 të KEDNJ-së​​ ​​ 

• Parashtruesi i kërkesës pretendon se Aktgjykimi i kontestuar i Gjykatës Supreme me të cilin është shtyrë ekzekutimi i vendimit të MEA-së paraqet ndërhyrje në të drejtën e​​ pronës. ​​ 

• Parashtruesi i kërkesës pretendon se duke pasur parasysh të gjitha aktet juridike ​​ dhe normat imperative, fundamentale që ato përmbajnë në lidhje me të drejtën në pronë e sidomos përcaktimin e Kushtetutës në lidhje me këtë të drejtë, shihet qartë se e drejta në pronë është e drejtë fundamentale dhe e pacenueshme e njeriut. Kjo shihet edhe nga fakti se në Kushtetutë, e drejta në pronë është vënë në pjesën ku gjenden të drejtat dhe liritë themelore të njeriut.

• Tutje, parashtruesi i kërkesës i referohet jurisprudencës së GJEDNJ-së, duke theksuar se koncepti i pronësisë nuk përfshin vetëm pronën dhe të drejtën mbi të në kuptim material dhe klasik të fjalës, por​​ përfshinë një​​ gamë​​ të gjerë të të drejtave monetare-të drejtat​​ që rrjedhin nga, ndër të tjera, licencat e​​ po ashtu edhe të drejtat​​ që rrjedhin nga drejtimi i një biznesi. Për më tepër, parashtruesi i kërkesës shton se,​​ “Madje, duke shkuar edhe më larg, në​​ Pressos Compania Naviera SA et al V. Belgium, GJEDNJ përfundoi se edhe një kërkesë për kompensim mund te konsiderohet si aset - ne kuptim të pasurisë dhe gëzon mbrojtje sipas Nenit 1, të Protokollit 1, të KEDNJ-së kur provohet mjaftueshëm nga pala se ekziston pritja legjitime që një kërkese e tillë mund të realizohet”.

• Përkitazi me pritjen legjitime, parashtruesi i kërkesës thekson se,​​ “Rrjedhimisht, në linjë me praktiken gjyqësore të GJEDNJ-së -​​ pajisja me leje ujore rrjedhimisht udhëzon edhe në të drejtën e pajisjes me licencë për prodhimin e energjisë elektrike nga ZRRE -​​ për të ushtruar këtë veprimtari ekonomike sipas kushteve ligjore të përcaktuara (në këtë rast sipas kritereve të parapara në legjislacionin relevant) përbën aset në kuptimin e pasurisë që rrjedh nga ushtrimi i veprimtarisë ekonomike. Duke pas· parasysh pritjet legjitime -​​ ngase ata kishin një pritje legjitime që afaronin në përputhje me Ligjin pasi që vetë shteti i kishte garantuar se në rast se ata i plotësonin kushtet ligjore (licencohen), atyre do t'u garantohet veprimtaria e papenguar - atëherë kjo pritje legjitime e tij gëzon mbrojtje sipas nenit 46 te Kushtetutës lidhur me nenin 1 të Protokollit 1 të KEDNJ”.​​ 

• Parashtruesi i kërkesës thekson se​​ Leja​​ Ujore që i është dhënë parashtruesit të kërkesës nga MEA është esenciale për aktivitetin e kësaj kompanie, ngase në momentin e zbatimit të një vendimi gjyqësor me të cilin ndalohet përkohësisht operimi mbi bazën e asaj licence, kompania është​​ e​​ detyruar të ndalojë në tërësi veprimtarinë e saj deri në vendosjen meritore të çështjes nga gjykata, që marrë parasysh mbingarkesën e gjykatave me lëndë, një vendim meritor për çështjen në fjalë pritet të merret pas më shumë se 3 (tri) vitesh.

• Më tej, parashtruesi i kërkesës shton: “Për të vërtetuar dëmin që i shkaktohet Parashtruesit të Kërkesës mjafton vetëm të shikohet prodhimi i energjisë elektrike nga​​ burimet e ripërtëritshme​​ të energjisë​​ për vitet 2019-2020 nga ana e këtij të fundit. Sipas vet raporteve të KOSTT, energjia elektrike e prodhuar dhe e lëshuar në rrjet nga ana e Parashtruesit të Kërkesës për vitin 2019 është 3, 672.5 MWh energji elektrike, nga gjithsejte 191, 700 MWh të prodhuara nga burimet e ripërtëritshme në Kosovë. Po ashtu, për vitin 2020 (si vit i pandemisë) Parashtruesi i Kërkesës ka prodhuar 4, 389.32 MWh energji të pastër elektrike. Këto te dhëna dëshmojnë se Parashtruesit​​ të​​ Kërkesës me pamundësinë e prodhimit të energjisë elektrike do t’i shkaktohet dëm jashtëzakonisht i madh”.

• Parashtruesi i kërkesës pretendon se përveç që dëmi është i madh në kuptimin monetar, i njëjti po ashtu është i pariparueshëm. Parashtruesi i kërkesës thekson se tek korporatat multinacionale struktura e financimit dhe instrumentet financiare për financimin e projekteve investuese​​ janë të​​ komplikuara. Në këtë aspekt, parashtruesi i kërkesës thekson se në rast se nuk fillohet me kthimin e mjeteve të investuara për një periudhë të gjatë, kjo do të rezultonte në pamundësinë financiare për të mbijetuar dhe parashtruesit të kërkesës do t’i kanosej seriozisht likuidimi.

• Tutje,​​ parashtruesi​​ i kërkesës thekson se në rastin e GJEDNJ-së,​​ Sporrong dhe​​ Lonnroth kundër Suedisë, nr. 7151/75 7152/75, Aktgjykim i 23 shtatorit 1982,  GJEDNJ ka vendosur 3 (tri) parime lidhur me intervenimin/kufizimin e të drejtës në pronës si në vijim: (i) parimi i ligjshmërisë; (ii) parimi i ekzistimit të qëllimit legjitim në mbrojtjen e interesit publik; dhe (iii) parimi i një baraspeshe të drejtë në mes të mbrojtjes së interesit publik dhe të drejtës në​​ pronë të një personi të caktuar (proporcionaliteti).​​ 

• Duke iu referuar rastit të GJEDNJ-së,​​ Capital Bank AD kundër Bullgarisë, parashtruesi i kërkesës shton: “GJEDNJ në rastin​​ Capital Bank AD kundër Bullgarisë, Nr. 49429/99, ka gjetur se kriteri i ligjshmërisë, supozon, ndër të tjera që ligji vendor duhet të ofroj mekanizëm për mbrojtje kundër ndërhyrjeve arbitrare nga ana e autoriteteve publike. Më tutje, Gjykata thekson se “koncepti i ligjshmërisë dhe i sundimit të ligjit në shoqëri demokratike kërkon që masat të cilat afektojnë të drejtat e njeriut, të mund të jenë objekt shqyrtimi para organeve të pavarura gjyqësore”. Andaj, sipas GJEDNJ-së, “çdo ndërhyrje në gëzimin paqësor të pronës duhet të përcjellët me garanci procedurale që i mundësojnë individëve apo subjekteve juridike që të prezantojnë rastin e tyre para autoriteteve përgjegjëse në mënyrë që të sfidojnë seriozisht hapat me të cilat është ndërhyrë në të drejtat e garantuara sipas kësaj dispozite”.

• Parashtruesi i kërkesës po ashtu pretendon se Gjykata Supreme ka shkelur nenin 119 (4) [Parimet e Përgjithshme] të Kushtetutës që obligon Republikën e Kosovës që të promovojë mirëqenie dhe zhvillim ekonomik të qëndrueshëm sepse,​​ “Marrë parasysh kapacitetet energjetike ekzistuese të Republikës së Kosovës, dhe faktin se përveç mungesës së theksuar të kapaciteteve prodhuese, edhe kriza globale energjetike, dhe rritja enorme e çmimeve të importit, Aktgjykimi i Gjykatës Supreme, është në kundërshtim të drejtpërdrejtë me Nenin 119, paragrafi 4, pasi që ky Aktgjykim dekurajon zhvillimin e qëndrueshëm ekonomik”.

• Parashtruesi i kërkesës pretendon se duke pasur parasysh zbatimin e gabuar të së drejtës procedurale dhe mungesën e arsyetimit bindës të Gjykatës Supreme, nuk ka pasur garanci të mjaftueshme ndaj arbitraritetit të Gjykatës Supreme çka ka rezultuar me shkelje të nenit 46 të Kushtetutës në lidhje me nenin 1 të Protokollit nr. 1 të KEDNJ-së.

• Vlerësimi i aplikueshmërisë së nenit 46 [Mbrojtja e Pronës] të Kushtetutës dhe nenit 1 të Protokollit nr. 1 të KEDNJ-së​​ ​​ 

• Fillimisht do të vlerësoj nëse​​ Leja​​ Ujore​​ nr. 5784/18,​​ e lëshuar nga Ministria e Ekonomisë dhe Ambientit (në tekstin e mëtejmë: MEA), përbën “pronë” brenda kuptimit​​ të këtyre dispozitave, për të konstatuar nëse neni 46 [Mbrojtja e Pronës] i Kushtetutës dhe neni 1 i Protokollit nr. 1 të KEDNJ-së janë të aplikueshëm në rrethanat e rastit konkret, përkatësisht nëse pretendimet e ngritura​​ nga​​ parashtruesi i kërkesës për shkelje të këtyre dispozitave janë​​ ratione materiae​​ në pajtueshmëri me Kushtetutën dhe KEDNJ-në, ashtu siç përcaktohet me rregullin 39 (3) të Rregullores së punës së Gjykatës. ​​ 

• Rikujtoj se objekt i vlerësimit të kërkesës së parashtruesit të kërkesës është pezullimi apo shtyrja e ekzekutimit të vendimeve për lëshimin e Lejes Ujore​​ nr. 5784/18​​ të​​ 18​​ shtatorit​​ 2020.​​ Po ashtu rikujtoj se parashtruesi i kërkesës posedon edhe Licencën për prodhimin e energjisë, të lëshuar nga ZRRE, megjithatë parashtruesit/propozuesit nuk kishin kërkuar pezullimin e kësaj licence, dhe​​ ajo,​​ si e tillë,​​ nuk përbën objekt të vlerësimit të kërkesës së tanishme.​​ Megjithatë, theksoj se veprimtaria biznesore e parashtruesit të kërkesës për prodhimin e energjisë nga burimet e ripërtritshme nuk mund të realizohet pa lejen ujore. Për pasojë, vërej se​​ leja​​ ujore është e domosdoshme për vazhdimin e ushtrimit të veprimtarisë biznesore të parashtruesit të kërkesës.

• Për të konstatuar nëse​​ leja​​ ujore përbën pronë në kuptim të nenit 46 të Kushtetutës në lidhje me nenin 1 të Protokollit nr. 1 të KEDNJ-së, i referohem praktikës gjyqësore të GJEDNJ-së. ​​ 

• GJEDNJ përmes praktikës së saj gjyqësore në parim ka theksuar se koncepti i pronës në kuptim të nenit 1 të Protokollit nr. 1 të KEDNJ-së ka një kuptim autonom i cili nuk është i kufizuar në posedimin e të mirave materiale dhe është i pavarur nga klasifikimi formal nga ana e legjislacionit vendor. Në këtë kuptim, GJEDNJ ka theksuar se duhet të përcaktohet që në rrethanat e rastit konkret, të shikuara në tërësinë e tij, parashtruesit të kërkesës i kanë akorduar një titull me interes përmbajtësor të garantuar më këtë dispozitë (shih​​ Brosset-Triboulet dhe të​​ tjerët kundër Francës​​ [DHM] nr. 34078/02, Aktgjykim i 29 marsit 2010, paragrafi 65).​​ 

• Në lidhje me veprimtarinë biznesore që i nënshtrohet kërkesës së​​ sigurimit të​​ një leje apo licence, Gjykata në rastin​​ Malik kundër Mbretërisë së Bashkuar​​ (kërkesa nr. 23780/08, Aktgjykim i 13 marsit 2012) kishte arsyetuar:​​ 

“91. Në rastet kur lëshimi i lejeve për ushtrimin e një aktiviteti biznesor, GJEDNJ ka theksuar se revokimi ose heqja e asaj leje apo licence paraqet ndërhyrje në të drejtën e parashtruesit për gëzim paqësorë të pronës, përfshirë edhe interesin ekonomik që ndërlidhet me biznesin (shih​​ Fredin kundër Suedisë​​ (Nr. 1), [nr. 12033/86, Aktgjykim i 18 shkurtit 1991, paragrafi 40] në lidhje me lejen e shfrytëzimit për një gropë zhavorri dhe mutatis mutandis​​ Tre Traktörer AB kundër Suedisë​​ [nr. 10873/84, Aktgjykim i 7 korrikut 1989] në lidhje me licencën për shërbimin e pijeve alkoolike në një restorant. Shih, gjithashtu,​​ Rosenzweig dhe Bonded Warehouses Ltd. kundër Polonisë​​ [i 30 nëntorit 2005, kërkesa nr. 51728/99, paragrafi 49] në lidhje me licencën për të drejtuar një magazinë për mallra të importuara). Në këtë kuptim Gjykata [GJEDNJ] në mënyrë specifike në rastin​​ Tre Traktörer AB​​ vërejti se vazhdimi i licencës ishte një nga kriteret apo kërkesat parësorë për ushtrimin e veprimtarisë biznesore të parashtruesit të kërkesës, dhe se revokimi i saj kishte efekt të pafavorshëm në mirëbesimin dhe vlerën e restorantit (shih paragrafët 43 dhe 53 të Aktgjykimit të Gjykatës).

[...]

94. ...[në] rastet që përfshijnë​​ pezullimin apo revokimin​​ e një licence apo leje ose refuzimi që një person të përfshihet në listën e individëve për ushtrimin e një profesioni specifik, Gjykata ka tentuar që konsiderojë si “pronë” biznesin themelor apo ushtrimin e profesionit në fjalë. Kufizimet e bëra ndaj regjistrimit, licencës apo lejeve që ndërlidhen me punën që ushtrohet përmes biznesit apo profesionit nga​​ Gjykata shikohen në përgjithësi si mjete përmes të cilave ka ndodhur ndërhyrja në një biznes​​ apo ushtrimin e​​ profesionit”.​​ 

• Marrë për bazë faktin që në rrethanat e rastit konkret, Leja Ujore nuk​​ është​​ revokuar por​​ është​​ pezulluar, duhet të shqyrtohet​​ nëse edhe pezullimi i një leje të tillë përbën “pronë”, gjegjësisht nëse neni 46 i Kushtetutës në lidhje me nenin 1 të Protokollit nr. 1 të KEDNJ-së është i aplikueshëm në rrethanat e parashtruesit të kërkesës. Gjykata në këtë rast i referohet edhe praktikës përkatëse gjyqësore të GJEDNJ-së që ndërlidhet me rrethanat kur shfrytëzimi i një leje ose licence është pezulluar apo ndaluar përkohësisht.

• Në lidhje me këtë të fundit, vërej se GJEDNJ në rastin​​ O'Sullivan McCarthy Mussel Development Ltd kundër Irlandës,​​ nr. 44460/16, Aktgjykim i 8 tetorit 2018​​ kishte konstatuar se licenca për mbledhjen e midhjeve dhe midhjeve të reja, e lidhur me aktivitetin parësor të biznesit të akuakulturës së parashtruesit të kërkesës, u konsiderua “pronë” në kuptim të nenit 1 të Protokollit nr. 1 të KEDNJ-së. Në këtë rast, GJEDNJ kishte theksuar:​​ 

“88. Në përputhje me sa më sipër, Gjykata vlerëson se rasti konkret ka të bëjë me një “pronë”, përkatësisht biznesin bazë të akuakulturës së kompanisë parashtruese. Është e vërtetë, siç theksoi Qeveria, se të gjitha licencat dhe autorizimet e ndryshme që kishte kompania parashtruese ruajtën vlefshmërinë e tyre në vitin 2008. Në këtë drejtim, rasti ndryshon nga rastet e vendosura më parë nga Gjykata, të cilat përfshinin anulimin ose revokimin të një licence ose lejeje, duke i dhënë fund një aktiviteti tregtar (shih, ndër shumë të tjera,​​ Tre Traktörer AB, të cituar më lart, ku licenca e kompanisë parashtruese për të shërbyer pije alkoolike u tërhoq duke çuar në mbylljen e ndërmarrjes menjëherë më pas; shih gjithashtu​​ Vékony kundër Hungarisë, nr. 65681/13, paragrafi 29, 13 janar 2015, që përfshin anulimin ligjor të licencës së parashtruesit për të shitur duhan, e pasuar menjëherë me mbylljen e biznesit të tij). Megjithatë, Gjykata vëren se ka gjetur gjithashtu se neni 1 i Protokollit Nr. 1 zbatohej edhe kur licenca në fjalë në fakt nuk ishte tërhequr, por konsiderohej se ngeli pa thelb (Centro Europa 7 S.r.l. dhe Di Stefano kundër Italisë​​ [GC], nr. 38433/09, paragrafët 177-178, GJEDNJ 2012).

89. Duke qenë të vetëdijshëm për nevojën për të parë përtej dukjes dhe për të hetuar realitetet e situatës për të cilën ankohet në rastin konkret, Gjykata konsideron se ndalimi i përkohshëm i peshkimit të farës së midhjes që u zbatua gjatë periudhave në fjalë në vitin 2008 duhet të konsiderohet me të drejtë si një kufizim i vendosur ndaj një leje – autorizimi i farës së midhjes që i është dhënë për vitin 2008 – lidhur me ushtrimin e zakonshëm të biznesit të vet.

90. Për Gjykatën, faktet e rastit zbulojnë kështu një ndërhyrje nga autoritetet vendore në të drejtën e kompanisë parashtruese për gëzimin paqësor të pronës të saj, duke përfshirë interesat ekonomike që lidhen me biznesin bazë. Megjithatë, fakti që ndërhyrja e kundërshtuar konsistonte në një ndalim të përkohshëm të një pjese të aktiviteteve të kompanisë parashtruese sipas licencës ose lejes, që autorizimi nuk ishte tërhequr ose revokuar, dhe se në çdo rast autorizimi në bazë të të cilit kompania parashtruese ushtronte biznesin u nënshtrohej kushteve, të gjitha do të jenë pjesë e analizës së Gjykatës për natyrën dhe shtrirjen e asaj ndërhyrjeje. Është brenda këtij konteksti të kufizuar dhe të veçantë që analiza e Gjykatës duhet kuptuar (shih, mutatis mutandis,​​ Malik, cituar më lart, paragrafi 95 dhe më poshtë).

91. Nga kjo rrjedh se kjo ankesë nuk është e papajtueshme ratione materiae me nenin 1 të Protokollit Nr. 1”.​​ 

• Bazuar në parimet e lartcekura, vërej se në rrethanat e rastit konkret leja ujore përbën​​ “pronë” për shkak se ndërlidhet​​ me ushtrimin e aktivitetit biznesor të parashtruesit të kërkesës për shfrytëzimin e​​ hidrocentralit për prodhimin e energjisë nga burimet e ripërtëritshme. Në rrethanat e rastit konkret, leja ujore​​ është​​ pezulluar me pasojën që edhe aktiviteti i tij parësor për prodhimin e energjisë nga burimet e ripërtëritshme është pezulluar deri në marrjen e një vendimi në merita nga gjykatat e rregullta.

• Duke i aplikuar konstatimet e lartcekura në rrethanat e rastit konkret, unë konsideroj se:

• leja ujore përbën pronë në kuptim të nenit​​ 46​​ të Kushtetutës në lidhje me nenin​​ 1​​ të Protokollit nr.​​ 1​​ të KEDNJ-së;

• pezullimi i lejes​​ ujore​​ ka rezultuar në kufizimin e përkohshëm për një kohë të pacaktuar të ushtrimit të veprimtarisë biznesore të parashtruesit të kërkesës; dhe

• ky kufizim mund të rezultojë me ndërhyrje në të drejtën për ​​ gëzimin paqësor të pronës së parashtruesit të kërkesës, duke përfshirë edhe interesat ekonomike që ndërlidhen me biznesin bazë.​​ ​​ 

• Rrjedhimisht, konstatoj se në rrethanat e parashtruesit të kërkesës, në të cilat rrethana procedura ndërlidhet me pezullimin e këtyre dy lejeve deri në nxjerrjen e një vendimi në merita, neni​​ 46​​ i Kushtetutës në lidhje me nenin 1 të​​ Protokollit nr.​​ 1​​ të KEDNJ-së, është i aplikueshëm​​ (shih, Mendimin konkurrues të gjyqtarit​​ Radomir Laban​​ në rastin​​ KI202/21,​​ të​​ 15​​ nëntorit​​ 2022, paragrafët​​ 18-33; gjithashtu, shih Mendimin konkurrues të gjyqtarit​​ Radomir Laban​​ në rastin​​ KI143/22,​​ të​​ 24​​ janarit​​ 2023,​​ paragrafët​​ 13-22).​​ 

• Përmbajtja e nenit 46 [Mbrojtja e Pronës] të Kushtetutës dhe nenit 1 të Protokollit nr. 1 të KEDNJ-së​​ 

• Në këtë kuptim, fillimisht rikujtoj përmbajtjen e nenit 46 [Mbrojtja e Pronës] të Kushtetutës dhe nenit 1 të Protokollit nr. 1 të KEDNJ-së. ​​ 

• • “E drejta e pronës është e garantuar.​​ 

  • ​​ Shfrytëzimi i pronës rregullohet me ligj, në pajtim me interesin publik.

  • Askush nuk do të privohet në mënyrë arbitrare nga prona. Republika e Kosovës ose autoriteti publik i Republikës së Kosovës mund të bëj ekspropriimin e pronës nëse ky ekspropriim është i autorizuar me ligj, është i nevojshëm ose i përshtatshëm për arritjen e qëllimit publik ose përkrahjen e interesit publik, dhe pasohet me sigurimin e kompensimit të menjëhershëm dhe adekuat për personin ose personat prona e të cilave eksproprijohet”.​​ 

[...]

Neni 1 (Mbrojtja e Pronës) i Protokollit nr. 1 të​​ KEDNJ-së:​​ 

• ​​ Çdo person fizik ose juridik ka të drejtën e gëzimit paqësor të pasurisë ​​ së tij. Askush nuk mund të privohet nga prona e tij, përveç se për arsye të interesit publik dhe në kushtet e parashikuara nga ligji dhe nga parimet e përgjithshme të së drejtës ndërkombëtare.​​ 

• Megjithatë, dispozitat e mëparshme nuk cenojnë të drejtën e shteteve për të zbatuar ligje, që ato i çmojnë të nevojshme për të rregulluar përdorimin e pasurive në përputhje me interesin e përgjithshëm ose për të siguruar pagimin e taksave ose të kontributeve ose të gjobave të tjera.​​ 

• Parimet themelore të nenit 46 [Mbrojtja e Pronës] të Kushtetutës dhe nenit 1 të Protokollit nr. 1 të KEDNJ-së​​ 

• Përmbajtja e nenit 1 të Protokollit nr. 1 të KEDNJ-së dhe zbatimi i tij, janë interpretuar nga GJEDNJ përmes praktikës gjyqësore të saj, të cilës, ashtu siç është theksuar më lart, do t'i referohem në lidhje me interpretimin e pretendimeve të parashtruesit të kërkesës për shkelje​​ të​​ nenit 46 të Kushtetutës në lidhje me nenin 1 të Protokollit nr. 1 të KEDNJ-së.

• Sa i përket të drejtave të garantuara dhe të mbrojtura me nenin 46 të Kushtetutës, fillimisht vlerësoj se e drejta e pronës nga paragrafi 1 i nenit 46 të Kushtetutës garanton të drejtën e posedimit të pronës; paragrafi 2 i nenit 46 të Kushtetutës përcakton mënyrën e shfrytëzimit të pronës, duke specifikuar qartë se shfrytëzimi i saj rregullohet me ligj dhe në pajtim me interesin publik; dhe, paragrafi 3, garanton që askush nuk mund të privohet nga prona në mënyrë arbitrare, duke përcaktuar gjithashtu kushtet nën të cilat prona mund të shpronësohet (shih rastin e Gjykatës​​ KI50/16, parashtrues​​ Veli Berisha dhe të tjerët, Aktvendim për papranueshmëri i 10 marsit 2017;​​ KI67/16, parashtruese Lumturije Voca,​​ Aktvendim për papranueshmëri i 6 dhjetorit 2016).

• Rikujtoj se na bazë të paragrafit 2 të nenit 46 të Kushtetutës, e drejta në pronë mund të kufizohet me ligj. Në këtë rast, konsideroj se Kuvendi, si organ ligjvënës, ka të drejtë të rregullojë me ligj shfrytëzimin e pronës, në përputhje me interesin publik.

• Sa i përket të drejtave të garantuara dhe të mbrojtura me nenin 1 të Protokollit nr. 1 të KEDNJ-së, vërej se GJEDNJ ka konstatuar se e drejta pronësore përbëhet nga tri rregulla të ndryshme. Rregulli i parë, i cili përcaktohet në fjalinë e parë të paragrafit të parë dhe i cili ka natyrë të përgjithshme, formulon parimin e gëzimit paqësor të pronës. Rregulli i dytë, në fjalinë e dytë të të njëjtit paragraf përfshin privimin nga prona dhe ia nënshtron atë kushteve të caktuara. Rregulli i tretë, i cili përfshihet në paragrafin e dytë të këtij neni ua njeh shteteve, ndërmjet të tjerash, të drejtën për të kontrolluar shfrytëzimin e pronës në pajtim me interesin e përgjithshëm, me zbatimin e atyre ligjeve që ato i konsiderojnë të nevojshme për këtë qëllim (shih rastin e GJEDNJ-së,​​ Sporrong dhe Lönnroth​​ kundër Suedisë, nr. 7151/75, 7152/75, Aktgjykim i 23 shtatorit 1982, paragrafi 61; dhe rastin e Gjykatës,​​ KI86/18, parashtruese Slavica Đordević, Aktgjykim i 3 shkurtit 2021, paragrafi 140).

• Megjithatë, të gjitha rregullat e mësipërme nuk janë "të ndryshme" në kuptimin që nuk janë të ndërlidhura me njëra tjetrën. Rregulli i dytë dhe ai i tretë i referohen rasteve të veçanta të ndërhyrjes në të drejtën për gëzimin paqësor të pronës dhe duhet të interpretohen në dritën e parimit të përgjithshëm të shprehur në rregullin e parë (shih rastet e GJEDNJ-së,​​ Bruncrona kundër Finlandës, të 16 shkurtit 2005, kërkesa nr. 41673/98, paragrafi 65;​​ Anheuser-Busch Inc kundër Portugalisë,​​ të​​ 11 janarit 2007, kërkesa 73049/01,​​ paragrafi 62;​​ James dhe të tjerët kundër Mbretërisë së Bashkuar, nr. 8793/79, Aktgjykim i 21 shkurtit 1986, paragrafi 37;​​ Beyeler kundër Italisë, nr. 33202/96, Aktgjykim i 5 janarit 2020, paragrafi 98, dhe shih rastin e Gjykatës​​ KI129/16, parashtrues “KOSBAU GmBH”, Aktvendim për papranueshmëri i 13 nëntorit 2017, paragrafi 35).

• Dispozitat e mësipërme, megjithatë, nuk do të zvogëlojnë në asnjë mënyrë të drejtën e shtetit për të zbatuar ligje të tilla që ai i konsideron të nevojshme për të kontrolluar përdorimin e pronës në përputhje me interesin e përgjithshëm ose për të siguruar pagesën e taksave ose kontributeve të tjera ose dënimeve (shih rastin e GJEDNJ-së,​​ Ish-Mbreti i Greqisë dhe të tjerët kundër Greqisë, nr. ​​ 25701/94, Aktgjykim i 23 nëntorit 2000, paragrafi 50).

• Megjithatë, ndërhyrja duhet të plotësojë disa kushte: ajo duhet të jetë në përputhje me parimin e ligjshmërisë dhe të ndjekë një qëllim legjitim në një mënyrë që është në proporcion të arsyeshëm me qëllimin që kërkohet të arrihet (shih rastin e GJEDNJ-së,​​ Beyeler kundër Italisë, cituar më lart, paragrafët 108- 114).

• Kjo qasje përfaqëson strukturën e metodës që Gjykata përdor për të shqyrtuar rastet kur bindet se neni 46 i Kushtetutës dhe​​ neni​​ 1 i Protokollit nr. 1 janë të aplikueshëm. Ajo përbëhet nga një sërë hapash të njëpasnjëshëm në të cilat zgjidhen pyetjet në vijim: A ka pasur ndonjë ndërhyrje në të drejtën e parashtruesit të kërkesës në gëzimin paqësor të “pronës” së tij? Nëse po, a përbën kjo ndërhyrje privim nga pronësia? Nëse jo, a është fjala për kontrollin e shfrytëzimit të pronësisë? Nëse masat që ndikuan në të drejtat e parashtruesit të kërkesës nuk mund të konsiderohen as privim dhe as kontroll të shfrytëzimit të pronësisë, Gjykata interpreton gjendjen faktike të rastit në dritën e rregullit të përgjithshëm të respektimit të gëzimit paqësor të “pronës”​​ (shih,​​ Mendimin konkurrues të gjyqtarit​​ Radomir Laban​​ në rastin​​ KI202/21,​​ të​​ 15​​ nëntorit​​ 2022, paragrafët​​ 35-42; shih, më tej, Mendimin konkurrues të gjyqtarit​​ Radomir Laban​​ në rastin​​ KI143/22,​​ të​​ 24​​ janarit​​ 2023,​​ paragrafët​​ 24-31; shih, gjithashtu, Mendimin​​ mospajtues​​ të gjyqtarit​​ Radomir Laban​​ në rastin​​ KI159/20, të​​ 9​​ dhjetorit​​ 2022, paragrafët​​ 72-79).​​ 

• Zbatimi i parimeve themelore të cekura më lart në rastin konkret​​ 

• Për të shqyrtuar pretendimet e parashtruesit të kërkesës në lidhje me shkeljen e nenit 46 [Mbrojtja e Pronës] të Kushtetutës dhe nenit 1 të Protokollit nr. 1 të KEDNJ-së, duhet së pari të zbatohet një test i cili përbëhet nga 4 (katër) hapa, përkatësisht duhet të përcaktohet:​​ (1)​​ nëse ka pasur pengesa ose ndërhyrje në gëzimin paqësor të pronës dhe cili lloj i ndërhyrjes ekziston në rastin konkret;​​ (2)​​ nëse pengesa ose ndërhyrja në gëzimin paqësor të pronës është përcaktuar me ligj;​​ (3)​​ nëse pengesa ose ndërhyrja në gëzimin paqësor të pronës ka pasur një qëllim legjitim; dhe​​ (4)​​ nëse pengesa apo ndërhyrja në gëzimin paqësor të pronës ishte proporcionale, përkatësisht e përpjesshme.​​ 

(1)​​ Nëse ka pasur pengesa ose ndërhyrje në gëzimin paqësor të pronës dhe cili lloj i ndërhyrjes ekziston në rastin konkret ​​ 

• Vërej se parashtruesit të kërkesës i ishin lëshuar lejet përkatëse për ushtrimin e aktivitetit të tij biznesor dhe atë përmes​​ Vendimit​​ për dhënien e Lejes Ujore nr. 5784/18, të lëshuar nga MEA. Në vijim të kësaj, ZRRE po ashtu i kishte lëshuar parashtruesit të kërkesës edhe Licencën për prodhimin e energjisë së ripërtritshme. Megjithatë, rikujtoj se kjo licencë nuk ishte objekt i propozimit të paditësve/propozuesve për shtyrje të ekzekutimit të saj në procedurën e ndjekur para gjykatave të rregullta. ​​ 

• Nga shkresat e lëndës rezulton se​​ paditësit/propozuesit,​​ Grupi për Studime Juridike dhe Politike (në tekstin e mëtejmë: GLPS) dhe Organizata GAIA dorëzuan, më 26 shkurt 2021,​​ një​​ padi në Gjykatën Themelore kundër MEA-së, me propozimin që (i)​​ të​​ aprovohet padia si tërësisht e bazuar; (ii)​​ të​​ anulohet Vendimi i MEA-së për lejen​​ ujore për HC Brezovica; (iii)​​ të​​ aprovohet kërkesa për masë të përkohshme; (iv) parashtruesi i kërkesës të ndalë ndërtimin e hidrocentraleve dhe strukturave të tyre mbështetëse në Komunën e Shtërpcës, HC Brezovica, HC Shtërpca, HC Viça dhe HC Sharri, deri në një vendim përfundimtar të gjykatës; si dhe (v) të aprovohet kërkesa për shtyrjen e ekzekutimit të​​ vendimeve.​​ 

• Në lidhje me kronologjinë procedurale të zhvilluar para gjykatave të rregullta, ashtu siç është elaboruar edhe më lart, rikujtoj se vendimi i fundit i nxjerrë në procedurë sipas propozimit për shtyrje të ekzekutimit të dy vendimeve të Ministrisë përgjegjëse është Aktgjykimi i kontestuar​​ [ARJ​​ nr. 116/2021]​​ i Gjykatës Supreme i​​ 28​​ tetorit​​ 2021,​​ përmes​​ të cilit​​ kjo e fundit​​ e​​ aprovoi​​ si​​ të​​ bazuar kërkesën​​ e paditësve për rishqyrtim të jashtëzakonshëm të vendimit gjyqësor, anuloi​​ Aktvendimin​​ [AA.​​ nr. 665/21]​​ e​​ Gjykatës së Apelit dhe la në fuqi Aktvendimin​​ [A.​​ nr. 472/2021]​​ e Gjykatës Themelore.​​  ​​​​ 

• Më tej, rikujtoj se​​ Gjykata Themelore​​ gjatë rivendosjes,​​ më​​ 17​​ qershor​​ 2021,​​ përmes Aktvendimit​​ [A.​​ nr. 472/2021]​​ aprovoi si të bazuar propozimin e paditësve dhe​​ pezulloi zbatimin e Vendimit të MEA-së, përkatësisht Vendimit për​​ aprovimin e Lejes Ujore nr. 5784/18 derisa gjykata të vendosë​​ me vendim përfundimtar lidhur me padinë e paditësve. Konstatoj se ky Aktvendim i Gjykatës Themelore është lënë në fuqi juridike me vendimin e kontestuar të Gjykatës Supreme.​​ 

• Bazuar në atë si më lart, rezulton që parashtruesit të kërkesës i është pezulluar ose shtyrë ekzekutimi i lejes ujore, të lëshuar nga një autoritet publik për një​​ kohë​​ të pacaktuar, dhe i cili pezullim në mënyrë të drejtpërdrejtë ka afektuar ushtrimin e aktivitet të tij biznesor.

• E përsëris se në përputhje me praktikën e GJEDNJ-së, përveç marrjes ose heqjes së licencave të vlefshme të biznesit, po ashtu edhe revokimi i përkohshëm apo pezullimi përben​​ ndërhyrje në të drejtën për gëzim paqësor të pronës, të garantuar me nenin 1 të Protokollit nr. 1. Sipas GJEDNJ-së, kjo ndërhyrje përbën një masë kontrolli të shfrytëzimit të pronës, e cila shqyrtohet sipas paragrafit të dytë të nenit 1 të Protokollit nr. 1 (shih,​​ mutatis mutandis,​​ rastin e GJEDNJ-së​​ O'Sullivan McCarthy Mussel Development Ltd kundër Irlandës, cituar më lart, paragrafi 104).

• Prandaj, bazuar në të lartcekurat, konsideroj se përmes vendimit përfundimtar të nxjerrë në këtë procedurë, gjegjësisht​​ përmes vendimit të kontestuar të Gjykatës Supreme, pezullimi apo shtyrja e ekzekutimit të​​ vendimit​​ për lëshimin e Lejes Ujore për një​​ kohë​​ të pacaktuar ka rezultuar​​ me​​ ndërhyrje në të drejtën e parashtruesit të kërkesës për gëzim paqësor të pronës, përkatësisht, kontrollimin e shfrytëzimit të pronës së parashtruesit të kërkesës, dhe për pasojë atij menjëherë i është pamundësuar ushtrimi i veprimtarisë së tij​​ ekonomike​​ dhe është penguar të ushtrojë veprimtarinë e tij biznesore për të cilën ka pasur leje të vlefshme​​ (shih, Mendimin konkurrues të gjyqtarit​​ Radomir Laban​​ në rastin​​ KI202/21,​​ të​​ 15​​ nëntorit 2022, paragrafët​​ 44-56; shih, më tej, Mendimin konkurrues të gjyqtarit​​ Radomir Laban​​ në rastin​​ KI143/22, të​​ 24​​ janarit​​ 2023,​​ paragrafët​​ 33-38; shih, gjithashtu, Mendimin​​ mospajtues​​ të gjyqtarit​​ Radomir Laban​​ në rastin​​ KI159/20,​​ të​​ 9​​ dhjetorit​​ 2022, paragrafët​​ 81-103).​​ 

• Megjithatë, rikujtoj se pavarësisht konstatimit të lartcekur se Aktgjykimi i kontestuar i Gjykatës Supreme ka rezultuar​​ me​​ ndërhyrje​​ në​​ gëzimin​​ paqësor të pronës nga ana e parashtruesit të kërkesës, kjo e fundit duhet në vijim të vazhdojë me shqyrtimin e çështjes nëse ndërhyrja ka qenë e paraparë me ligj (shih rastin e GJEDNJ-së,​​ Megadat.com SRL kundër Moldavisë, cituar më lart, paragrafi 66).

(2)​​ Nëse pengesa ose ndërhyrja në gëzimin paqësor të pronës është përcaktuar me ligj

• Për të kryer këtë hap të testit, përkatësisht për të përcaktuar nëse pengesa ose ndërhyrja në gëzimin paqësor të pronës ishte përcaktuar me ligj, fillimisht do të përshkruaj​​ (a)​​ parimet e përgjithshme të GJEDNJ-së të treguara në praktikën gjyqësore në lidhje me shprehjen “e paraparë me ligj” (“prescribed by law”) dhe më pas do të kryej​​ (b)​​ zbatimin e parimeve të përgjithshme të parapara me ligj (“prescribed by law”).​​ 

(a)​​ ​​ Parimet e përgjithshme të GJEDNJ-së të paraqitura në praktikën gjyqësore lidhur me shprehjen “e paraparë me ligj” (“prescribed by law”)

• Çdo ndërhyrje në të drejtat e mbrojtura me nenin 1 të Protokollit nr. 1 duhet të jetë në pajtim me prezumimin e ligjshmërisë (shih rastet e GJEDNJ-së,​​ Vistiņš dhe Perepjolkins kundër Letonisë, nr. 71243/01, Aktgjykim i 25 tetorit 2012, paragrafi 95;​​ Béláné Nagy kundër Hungarisë, nr. 53080/13, Aktgjykim i 13 dhjetorit 2016, paragrafi 112). Shprehja “në kushtet e parapara me ligj” që i referohet çdo ndërhyrjeje në të drejtën për gëzimin paqësor të “pronës” duhet të interpretohet në të njëjtën mënyrë si shprehja “në pajtim me ligj” nga neni 8 i KEDNJ-së në raport me të drejtat e mbrojtura nga ajo dispozitë ose termi “e paraparë me ligj” që i referohet ndërhyrjes në të drejtat e mbrojtura sipas neneve 9, 10 dhe 11 të KEDNJ-së.

• Parimi i ligjshmërisë është kërkesa e parë dhe më e rëndësishme nga neni 1 i Protokollit nr. 1. Fjalia e dytë e paragrafit të parë e lejon ndërhyrjen në “pronë” vetëm “në kushtet e parapara me ligj”, dhe paragrafi i dytë u njeh shteteve të drejtën të kontrollojnë përdorimin e pronës duke zbatuar “ligjet”. Përveç kësaj, sundimi i ligjit, një nga parimet themelore të një shoqërie demokratike, është pjesë e të gjitha neneve të KEDNJ-së (shih rastet e GJEDNJ-së,​​ Iatridis kundër Greqisë, Aktgjykim i 25 marsit 1999, nr. 31107/96, paragrafi 58;​​ Ish-Mbreti i Greqisë dhe të tjerët kundër Greqisë, cituar më lart, paragrafi 79; dhe​​ Broniowski kundër Polonisë, nr. 31443/96, Aktgjykim i 22 qershorit 2004, paragrafi 147).

• Ekzistenca e një baze ligjore në të drejtën e brendshme nuk mjafton në vetvete për të përmbushur parimin e ligjshmërisë. Përveç kësaj, baza ligjore duhet të ketë një cilësi të caktuar, domethënë të jetë në përputhje me sundimin e ligjit dhe të ofrojë garanci kundër arbitraritetit. Në lidhje me këtë, duhet theksuar se kur flitet për “ligjin”, neni 1 i Protokollit nr. 1 aludon për të njëjtin koncept të cilit KEDNJ i referohet në nene të tjerë kur përdor atë shprehje, një koncept që përfshin ligjet dhe praktikën gjyqësore (shih rastet e GJEDNJ-së,​​ Špaček, s.r.o. kundër Republikës Çeke, nr. 26449/95, Aktgjykim i 9 nëntorit 1999, paragrafi 54;​​ Vistiņš dhe Perepjolkins kundër Letonisë, cituar më lart, paragrafi 96).​​ 

• Parimi i ligjshmërisë nënkupton gjithashtu se dispozitat e zbatueshme të ligjit të brendshëm janë mjaftueshëm të qasshme, të sakta dhe të parashikueshme në zbatimin e tyre (shih rastet e GJEDNJ-së,​​ Beyeler kundër Italisë, cituar më lart, paragrafi 109;​​ Ališić dhe të tjerët kundër Bosnjës dhe Hercegovinës, Kroacisë, Serbisë, Sllovenisë dhe Ish-Republikës Jugosllave të Maqedonisë, nr. 60642/08, Aktgjykim i 16 korrikut 2016, paragrafi 103;​​ Centro Europa 7 S.R.L. dhe DI Stefano kundër Italisë, cituar më lart, paragrafi 187).

• Në lidhje me disponueshmërinë, termi “e drejtë” duhet të interpretohet në kuptimin e tij material, jo në kuptimin e tij formal. Prandaj, fakti që disa rregulla të caktuara që kanë të bëjnë me ushtrimin e të drejtave të mbrojtura me nenin 1 të Protokollit nr. 1 nuk janë publikuar në gazetat zyrtare në formën e parashikuar me ligjin për miratimin e instrumenteve legjislative ose rregullatore që detyrojnë qytetarët dhe personat juridikë në përgjithësi, nuk pengon që këto rregullore të konsiderohen e drejtë, nëse Gjykata është e bindur se publiku është i vetëdijshëm për to në një mënyrë tjetër (shih rastin e GJEDNJ-së,​​ Špaček, s.r.o., kundër Republikës Çeke, cituar më lart, paragrafët 57-60).

• Më tej, Gjykata rikujton se kur shqyrtohen në bazë të nenit 1 të Protokollit nr. 1, ligjet me zbatim retrospektiv për të cilët u konstatua se përfaqësojnë ndërhyrje legjislative ishin megjithatë në përputhje me kërkesën e ligjshmërisë nga neni 1 i Protokollit nr. 1 (shih rastet e GJEDNJ-së,​​ Maggio dhe të tjerët kundër Italisë, nr. 46286/09, 52851/08, 53727/08, 54486/08 dhe 56001/08, Aktgjykim i 31 gushtit 2011, paragrafi 60;​​ Arras dhe të tjerët kundër Italisë, nr. 17972/07, Aktgjykim i 14 majit 2012, paragrafi 81).​​ 

• Përdorimi i masave të kontrollit të zbatuara në bazë të ligjeve të nxjerra pas shfaqjes së fakteve që çojnë deri te ndërhyrja, si të tilla, nuk janë të paligjshme (shih rastin e GJEDNJ-së,​​ Saliba kundër Maltës, nr. 4251/02, Aktgjykim i 8 shkurtit 2006, paragrafët 39-40) nëse ato ligje nuk janë miratuar në veçanti për të ndikuar në rezultatin e një rasti individual. As Konventa dhe as protokollet e saj nuk parandalojnë ndërhyrjen e legjislativit në kontratat ekzistuese me efekt prapaveprues (shih rastin e GJEDNJ-së,​​ Mellacher dhe të tjerët kundër Austrisë, nr. 10522/83, 11011/84, 11070/84, Aktgjykim i 19 dhjetorit 1989; paragrafi 50;​​ Bäck kundër Finlandës, nr. 37598/97, Aktgjykim i 20 tetorit 2004, paragrafi 68).​​ 

• Megjithatë, në rrethana të caktuara, zbatimi retrospektiv i legjislacionit që ka efektin e privimit të një personi nga “prona” ekzistuese e cila ishte pjesë e “pronësisë” së tij mund të përbëjë një ndërhyrje që mund të prishë ekuilibrin e drejtë midis kërkesave me interes të përgjithshëm nga njëra anë dhe mbrojtjes​​ së të​​ drejtës​​ për gëzimin paqësor të​​ “pronësisë” nga ana tjetër (shih rastin e GJEDNJ-së,​​ Maurice kundër Francës, nr. 11810/03, Aktgjykim i 6 tetorit 2005, paragrafët 90 dhe 93).​​ 

• Parimi i ligjshmërisë përfshin gjithashtu detyrën e shtetit ose autoritetit tjetër publik për të respektuar urdhrat e gjykatës ose vendimet e marra kundër tij (shih rastin e GJEDNJ-së,​​ Belvedere Alberghiera S.r.l. kundër Italisë, nr. 31524/96, Aktgjykim i 30 tetorit 2000, paragrafi 56).

• Në ​​ fund, në rastin​​ Aliyeva dhe të tjerët kundër Azerbajxhanit, GJEDNJ gjithashtu konkludoi se kur vendimet qartazi kontradiktore, dhe veçanërisht vendimet e Gjykatës Supreme, ku janë nxjerrë aktgjykimet që përmbanin vlerësime kontradiktore për të njëjtën situatë në rastet e parashtruesve të kërkesës dhe në rastet e iniciuara nga persona të tjerë, përfaqësojnë ndërhyrje në të drejtën për gëzimin paqësor të pronës, nëse nuk jepet shpjegim i arsyeshëm për dallimet, ndërhyrjet e tilla nuk mund të konsiderohen të ligjshme për qëllimet e nenit 1 të Protokollit nr. 1 të Konventës sepse çojnë në mospërputhje të procedurave të tyre (shih rastin e GJEDNJ-së,​​ Aliyeva dhe të tjerët kundër Azerbajxhanit, nr. 66249/16 66271/16 75978/16 77309/16 77691/16 1038/17 52821/17, Aktgjykim i 21 dhjetorit 2021, paragrafët 130-135;​​ shih, gjithashtu, Mendimin konkurrues të gjyqtarit​​ Radomir Laban​​ në rastin​​ KI202/21, të​​ 15​​ nëntorit​​ 2022, paragrafët​​ 59-68; shih, më tej,​​ Mendimin konkurrues të gjyqtarit​​ Radomir Laban​​ në rastin​​ KI143/22, të​​ 24​​ janarit​​ 2023,​​ paragrafët​​ 41-50; shih,​​ gjithashtu,​​ Mendimin mospajtues të gjyqtarit​​ Radomir Laban​​ në rastin​​ KI159/20, të​​ 9​​ dhjetorit​​ 2022, paragrafët​​ 106-115)​​ 

(b)​​ Zbatimi i parimeve të përgjithshme “të parapara me ligj” (“prescribed by law”)

• Në lidhje me këtë kriter, para së gjithash vërej se deri te ndërhyrja në të drejtën për gëzimin paqësor të pronës ka ardhur me Aktvendimin​​ [A.​​ nr. 472/2021]​​ e Gjykatës Themelore të​​ 17​​ qershorit​​ 2021,​​ e cila në rivendosje e aprovoi si të bazuar propozimin e paditësve dhe shtyu​​ ekzekutimin e vendimit të MEA-së, përkatësisht Vendimit për aprovimin e Lejes Ujore me nr.​​ 5784/18,​​ derisa gjykata të vendosë me vendim përfundimtar përkitazi me padinë e paditësve.​​ ​​ 

• Në arsyetimin e​​ Aktvendimit të​​ Gjykatës Themelore u theksua se ishin përmbushur kushtet nga paragrafi​​ 6​​ lidhur me paragrafin​​ 2​​ të nenit​​ 22​​ të LKA-së për shtyrjen e ekzekutimit të vendimit të kundërshtuar deri në vendosjen përfundimtare të çështjes. Në këtë drejtim, Gjykata Themelore vlerësoi se paditësit/propozuesit kishin ofruar argumente të besueshme, fotografi të protestave të qytetarëve ndër vite, fotografi të dëmtimit të natyrës, raporte të organizatave të ndryshme përkitazi me ndërtimin e hidrocentraleve, të cilat vërtetonin se ekzekutimi i vendimeve do t’i sillte dëm banorëve​​ të pjesës në të cilën parashihej të operojnë këto hidrocentrale, dëm ky i cili vështirë do të riparohej.​​ ​​ 

• Për më tepër, Gjykata Themelore përmes Aktvendimit të saj vlerësoi se burimet ujore dhe qasja në ujë të pijshëm dhe për ujitje, cilësia e ujit, ndikimet negative në florë dhe faunë përbënin interes të përgjithshëm shtetëror dhe se shtyrja e ekzekutimit të vendimit të atakuar deri në vendosjen e çështjes në mënyrë përfundimtare ishte në interesin publik dhe nuk do t’i sillte ndonjë dëm të madh palës kundërshtare, përkatësisht personave të interesuar. ​​ 

• Prandaj, Gjykata Themelore me rastin e shtyrjes së vendimeve të të paditurve dhe pezullimit të ekzekutimit të Lejes Ujore për një periudhë të pacaktuar, i është referuar nenit​​ 22​​ paragrafi​​ 2​​ të Ligjit nr.​​ 03/L-202​​ për Konfliktet Administrative​​ (LKA)​​ dhe nenit​​ 6​​ të Ligjit nr.​​ 03/L-202​​ për Konfliktet​​ Administrative​​ (LKA), duke i theksuar si bazë ligjore për shtyrjen e ekzekutimit të vendimeve të të paditurve dhe pezullimin e ekzekutimit të Lejes Ujore për një periudhë të pacaktuar derisa gjykata të vendosë me vendim përfundimtar lidhur me padinë e paditësve.​​ 

• Ky arsyetim mbështet nga Aktgjykimi​​ [ARJ​​ nr. 116/2021]​​ i Gjykatës Supreme, e cila arsyetoi:​​ “Sipas vlerësimit të kësaj gjykate paditësit-propozuesit me padi dhe me kërkesë për rishqyrtim të​​ jashtëzakonshëm të vendimit të plotfuqishëm gjyqësor kanë ofruar dëshmi të besueshme se me​​ ekzekutimin e vendimit të organit të paditur para se të vlerësohet ligjshmëria e tij do të shkaktohej​​ dëm i cili vështirë do të riparohej dhe do të ishte në interes publik shtyrja e vendimit të organit​​ të paditur. Gjithashtu kolegji vlerëson se në këtë rast bëhet fjalë për investim material me​​ ndërtimin e hidrocentralit dhe nëse do të vendosej ndryshe me vendosjen meritore të çështjes do​​ të ishte i vështirë rikuperimi dhe evitimi i dëmeve. Prandaj shtyrja e ekzekutimit të vendimit të​​ organit të paditur gjer në vendosjen meritore me vendim përfundimtar, nuk është në kundërshtim​​ me interesin publik, përkundrazi, dhe palës kundërshtare apo palës së interesuar nuk provohet​​ se do ti shkaktohet dëm i madh apo i pariparueshëm. Gjer sa në anën tjetër do të shmangeshin​​ pasojat e mundshme si do që të vendoset meritorisht gjatë vlerësimit të ligjshmërisë në baza​​ ligjore të vendimit të kontestuar me padi nga paditëset, në fund të procesit gjyqësor”.​​ 

• Bazuar në atë si më sipër, konkludoj se ndërhyrja në gëzimin paqësor të pronës së parashtruesit të kërkesës është shkaktuar me vendimit e gjykatave të rregullta, përkatësisht Gjykatës Supreme, bazuar në ligjin e aplikueshëm, përkatësisht Ligjin nr.​​ 03/L-202​​ për Konfliktet Administrative, i cili është miratuar nga Kuvendi i Republikës së Kosovës dhe i cili ka qenë në fuqi​​ juridike​​ në momentin e marrjes së vendimit.​​ 

• Parimi i ligjshmërisë nënkupton gjithashtu se dispozitat e zbatueshme të ligjit të brendshëm janë mjaftueshëm të qasshme, të sakta dhe të parashikueshme në zbatimin e tyre,​​ në rastin konkret, kemi të bëjmë me një ligj të votuar në një seancë publike të Kuvendit, i cili është publikuar në Gazetën Zyrtare dhe është i disponueshëm online në ueb, prandaj,​​ Gjykata arrin në përfundimin se ligji ishte në dispozicion të parashtruesve të kërkesës dhe se normat ishin të sakta dhe të parashikueshme.​​ 

• Përdorimi i masave të kontrollit të zbatuara në bazë të ligjeve të nxjerra pas shfaqjes së fakteve që çojnë deri te ndërhyrja, si të tilla, nuk janë të paligjshme​​ (shih rastin e GJEDNJ-së,​​ Saliba​​ kundër Maltës, nr. 4251/02,​​ Aktgjykim i​​ 8​​ shkurtit​​ 2006,​​ paragrafët​​ 39-40)​​ nëse ato ligje nuk janë miratuar në veçanti për të ndikuar në rezultatin e një rasti individual. Në rastin konkret, vërej se ligji i kontestuar ka efekt të përgjithshëm dhe nuk synon të ndikojë në rastin individual të parashtruesit të kërkesës, por ka vepruar​​ erga omnes​​ dhe ka synuar të rregullojë rregullat e procedurës administrative në tërësi.​​ 

• Konstatoj se masat për kontrollin e përdorimit të pronës, përkatësisht masat për shtyrjen e ekzekutimit të vendimeve të të paditurve dhe pezullimi i ekzekutimit të Lejes Ujore për një afat të pacaktuar janë marrë në bazë të neneve​​ 6​​ dhe​​ 22​​ të Ligjit nr.​​ 03/L-202​​ për Konfliktet Administrative. Gjithashtu, është e qartë se dispozitat e neneve​​ 6​​ dhe​​ 22​​ të Ligjit nr.​​ 03/L-202​​ për Konfliktet Administrative ishin përgjithësisht të zbatueshme, se ato ishin të vlefshme dhe ligjërisht të aplikueshme, se të njëjtat ishin në dispozicion dhe të parashikueshme për parashtruesin e kërkesës.​​ 

• Nga të gjitha sa më sipër, konstatoj se dispozitat e Ligjit ishin të parashikueshme sepse ato ishin formuluar me qartësinë dhe saktësinë e nevojshme. Rrjedhimisht, Gjykata konkludon se ndërhyrja në të drejtën e parashtruesit të kërkesës për gëzimin paqësor të pronës, e cila është bërë me vendimet e kontestuara të gjykatave të rregullta në këtë rast është bërë në bazë të ligjit​​ (shih Mendimin konkurrues të gjyqtarit​​ Radomir Laban​​ në rastin​​ KI202/21, të​​ 15​​ nëntorit​​ 2022, paragrafët​​ 69-78; shih, më tej,​​ Mendimin konkurrues të gjyqtarit​​ Radomir Laban​​ në rastin​​ KI143/22,​​ të​​ 24​​ janarit​​ 2023,​​ paragrafët​​ 51-56; shih, gjithashtu, Mendimin mospajtues të gjyqtarit​​ Radomir Laban​​ në rastin​​ KI159/20, të​​ 9​​ dhjetorit​​ 2022, paragrafët​​ 116-124).​​ ​​ 

(3)​​ Nëse pengesa ose ndërhyrja në gëzimin paqësor të pronës ka ndjekur një qëllim legjitim​​ (interesin publik)

• Sipas GJEDNJ-së, çdo ndërhyrje në gëzimin e të drejtave dhe lirive të njohura nga Konventa duhet të ketë një qëllim legjitim. Po kështu, në rastet që përfshijnë një detyrë pozitive, duhet të ketë një justifikim legjitim për mosveprimin e shtetit. Vetë parimi i “ekuilibrit të drejtë” i qenësishëm për nenin 1 të Protokollit nr. 1, presupozon ekzistencën e një interesi të përgjithshëm të komunitetit.​​ Për më tepër, duhet përsëritur se rregullat e ndryshme të përfshira në nenin 1 nuk janë të dallueshme, në kuptimin e moskoherencës, dhe se rregulli i dytë dhe i tretë u referohen vetëm rasteve të veçanta të ndërhyrjes në të drejtën për gëzimin paqësor të pronës.​​ Një nga efektet e kësaj është se ekzistenca e “interesit publik” e përcaktuar në fjalinë e dytë, ose “interesit të përgjithshëm” në paragrafin e dytë, në fakt janë pasojë e parimit të përcaktuar në fjalinë e parë, kështu që ndërhyrja në ushtrimin e të drejtës për gëzimin paqësor të pronës në kuptimin e fjalisë së parë të nenit 1 duhet të ketë gjithashtu një qëllim në interesin publik (shih, rastet e GJEDNJ-së,​​ Broniowski kundër Polonisë, cituar më lart, paragrafi 148;​​ Könyv-Tár Kft dhe të tjerët kundër Hungarisë, nr. 21623/13, Aktgjykim i 16 marsit 2018, paragrafi 45;​​ Beyeler kundër Italisë, cituar më lart, paragrafi 111).

• Lista e qëllimeve për të cilat ndërhyrja do të binte në sferën e konceptit të interesit publik është e gjerë dhe mund të përfshijë qëllime të ndryshme të reja që i nënshtrohen shqyrtimeve të politikës publike në kontekste të ndryshme faktike. Konkretisht, vendimi për të miratuar një ligj, sipas të cilit konfiskohet prona ose kompensimi nga sigurimi social zakonisht përfshin shqyrtimin e çështjeve politike, shoqërore dhe sociale (shih rastet e GJEDNJ-së,​​ Ish-Mbreti i Greqisë dhe të tjerët kundër Greqisë, cituar më lart, paragrafi 87;​​ Vistiņš dhe Perepjolkins kundër Letonisë,​​ cituar më lart, paragrafi 106).

• Nën sistemin e mbrojtjes që është themeluar nga Konventa, u mbetet autoriteteve nacionale që të bëjmë vlerësimin fillestar lidhur me ekzistimin e një problemi që përbën brengë publike e për të cilin duhet ndërmarrë masa të privimit të pronës ose ndërhyrjes në gëzimin paqësor të “pronave”. Këtu, siç ndodhë në fushat tjera të cilat i mbron Konventa, autoritetet nacionale gëzojnë një margjinë të gjerë të vlerësimit. Për shembull, margjina e vlerësimit që është në dispozicion të legjislaturës gjatë implementimit të politikave sociale dhe ekonomike do të jetë e gjerë dhe Gjykata do të respektojë gjykimin e legjislaturës nacionale lidhur me atë që është “në interes publik”, përveç nëse ai është në mënyrë evidente pa bazë të arsyeshme (shih rastin e GJEDNJ-së,​​ Béláné Nagy kundër Hungarisë, cituar më lart, paragrafi 113).

• Më tej, koncepti i “interesit publik” është domosdoshmërisht i gjerë (shih rastet e GJEDNJ-së,​​ Vistiņš dhe Perepjolkins kundër Letonisë,​​ cituar më lart, paragrafi 106;​​ R.Sz. kundër Hungarisë, nr. 41838/11, Aktgjykim i 4 nëntorit 2013, paragrafi 44;​​ Grudić kundër Serbisë, nr. 31925/08, Aktgjykim i 24 shtatorit 2012, paragrafi 75). Gjykata zakonisht respekton pretendimet e shteteve se ndërhyrja që shqyrton ishte në interes publik dhe shqyrtimi i saj në këtë drejtim është i intensitetit më të ultë. Prandaj, pretendimi i parashtruesit të kërkesës se një masë e caktuar në realitet i shërbente një qëllimi të ndryshëm nga ai që ishte thirrur shteti i paditur në kontekstin e një rasti të veçantë në Gjykatë, rrallëherë ka një perspektivë serioze për sukses. Në çdo rast, është e mjaftueshme për Gjykatën që ndërhyrja të jetë në interesin publik, edhe nëse ky interes është i ndryshëm nga interesi i shprehur shprehimisht nga shteti në procedurën në Gjykatë. Madje, në disa raste, Gjykata e konstatoi qëllimin sipas detyrës zyrtare (Ambruosi kundër Italisë, nr. 31227/96,​​ Aktgjykim i 19 janarit 2001, paragrafi 28;​​ Marija Božić kundër Kroacisë, 50636/09,​​ Aktgjykim i 24 prillit 2014, paragrafi 58).

• Si rezultat i këtij respekti për vlerësimin e autoriteteve vendase, ka shembuj të rrallë të situatave në të cilat Gjykata nuk ka konstatuar se ka një interes publik që do të justifikonte ndërhyrjen (shih rastet e GJEDNJ-së,​​ S.A. Dangeville kundër Francës, nr. 36677/97, Aktgjykim i 16 korrikut 2002, ​​ paragrafët 47 dhe 53-58 – moskthimi i taksës së parapaguar;​​ Rosenzweig dhe Bonded Warehouses Ltd. kundër Polonisë, cituar më lart, paragrafi 56 - anulimi i licencës së biznesit të parashtruesit të kërkesës pa iu referuar ndonjë arsyeje me interes publik nga autoritetet në vendimet autoritative).

• Duke iu​​ rikthyer rastit konkret, fillimisht vërej se ndërhyrja në gëzimin paqësor të pronës është shkaktuar me Aktvendimin​​ [A.​​ nr. 472/2021]​​ e Gjykatës Themelore të​​ 17​​ qershorit​​ 2021,​​ e cila​​ gjykatë​​ e aprovoi si të bazuar kërkesën e paditësit për shtyrje të ekzekutimit të vendimeve të të paditurve dhe pezulloi ekzekutimin e Lejes Ujore për një​​ periudhë​​ të pacaktuar derisa gjykata të vendosë​​ me vendim përfundimtar përkitazi me padinë e paditësve.​​ 

• Vërej se Gjykata Themelore në Aktvendimin​​ [A.​​ nr. 472/2021], gjatë arsyetimit të interesit publik theksoi si në vijim:​​ 

“Rrjedhimisht, gjatë rivendosjes, janë shqyrtuar përsëri padia, propozimi i paditësit, shkresat e lëndës dhe provat e paraqitura nga paditësi me padi.​​ Në bazë të dispozitave të nenit​​ 22​​ paragrafi​​ 2​​ dhe​​ 6​​ të LKA-së, duke shqyrtuar kërkesën për shtyrjen e ekzekutimit të vendimeve të kundërshtuara,​​ Gjykata vlerësoi se paditësit/propozuesit kanë ofruar argumente të besueshme, dhe atë fotot të protestave të mbajtura ndër vite të qytetarëve lidhur me mos ndërtimin e hidrocentralit, foto të dëmtimit të natyrës, raporte të organizatave lidhur me ndërtimin e hidrocentraleve, të cilat vërtetojnë faktin se ekzekutimi i vendimit do t'i sillte dëm banoreve të pjesës në të cilën parashihet të operojnë këto Hidrocentrale, dëm ky i cili vështirë do te riparohej.​​ Gjithashtu Gjykata gjeti se shtyerja e ekzekutimit të vendimit deri në vendosjen e çështjes në mënyrë meritore, nuk është në kundërshtim dhe nuk do t'i sillte ndonjë dëm të madh palës kundërshtare, përkatësisht personave te interesuar.

Meqenëse burimet ujore, qasja e pandërprerë në ujë të pijshëm dhe për ujitje si dhe cilësia e ujit, ndikimet negative në vlerat e përgjithshme natyrore, në flore në faunë ujore dhe tokësore, në peisazhe përbëjnë interes të përgjithshëm shtetëror, gjykata vlerësoi se shtyerja e ekzekutimit të vendimit të atakuara deri në vendosjen lidhur me padinë e paditësit është në interesin publik e që shtyerja nuk do t'i sillte dëm të madh palës kundërshtare në këtë rast ministrisë, e po ashtu personit të interesuar kompanisë "Matkos Group", ngase në këtë rast për të njëjtën shtyerja e ekzekutimit nënkupton vetëm shtyrje të fitimit për më vonë. Kjo do të shmangte pasojat e​​ mundshme që do të shkaktoheshin në të ardhmen, nëse vendimi i kundërshtuar i të paditurës, në fund të procesit gjyqësor, rezulton se është marr në kundërshtim me ligjin.​​ 

Në këtë kuptim, gjykata vlerësoi se janë përmbushur kushtet nga neni 22 paragrafi 6 në lidhje me paragrafin 2 të LKA-së, për shtyrjen e ekzekutimit të vendimeve të kundërshtuara deri në vendosjen përfundimtare të çështjes“.​​ 

• Ky arsyetim mbështetet nga Aktgjykimi​​ [ARJ​​ nr. 116/2021]​​ i Gjykatës​​ Supreme, e cila arsyetoi:​​ “Sipas vlerësimit të kësaj gjykate paditësit-propozuesit me padi dhe me kërkesë për rishqyrtim të​​ jashtëzakonshëm të vendimit të plotfuqishëm gjyqësor kanë ofruar dëshmi të besueshme se me​​ ekzekutimin e vendimit të organit të paditur para se të vlerësohet ligjshmëria e tij do të shkaktohej​​ dëm i cili vështirë do të riparohej dhe do të ishte në interes publik shtyrja e vendimit të organit​​ të paditur. Gjithashtu kolegji vlerëson se në këtë rast bëhet fjalë për investim material me​​ ndërtimin e hidrocentralit dhe nëse do të vendosej ndryshe me vendosjen meritore të çështjes do​​ të ishte i vështirë rikuperimi dhe evitimi i dëmeve. Prandaj shtyrja e ekzekutimit të vendimit të​​ organit të paditur gjer në vendosjen meritore me vendim përfundimtar, nuk është në kundërshtim​​ me interesin publik, përkundrazi, dhe palës kundërshtare apo palës së interesuar nuk provohet​​ se do ti shkaktohet dëm i madh apo i pariparueshëm. Gjer sa në anën tjetër do të shmangeshin​​ pasojat e mundshme si do që të vendoset meritorisht gjatë vlerësimit të ligjshmërisë në baza​​ ligjore të vendimit të kontestuar me padi nga paditëset, në fund të procesit gjyqësor“.

• Bazuar në sa më sipër, vërej se gjykatat e rregullta, përkatësisht Gjykata Themelore dhe Gjykata Supreme, në arsyetimet e tyre janë përpjekur të arsyetojnë se vendimet për shtyrjen e ekzekutimit të vendimeve të të paditurve dhe pezullimin e ekzekutimit të Lejes Ujore për një periudhë të pacaktuar derisa gjykata të vendosë me vendim gjyqësor përfundimtar lidhur me padinë e paditësve, janë marrë me arsyetimin se mbrojnë interesin publik dhe​​ në përpjekje për të shmangur dëmet e pariparueshme që mund të shkaktohen.​​ 

• Rikujtoj se autoritetet shtetërore gëzojnë një margjinë të gjerë të vlerësimit si në drejtim të zgjedhjes së mjeteve zbatuese ashtu edhe në aspektin e konstatimit nëse pasojat e zbatimit justifikohen me interesin e përgjithshëm për të arritur qëllimin e ligjit të caktuar​​ (shih rastin e GJEDNJ-së,​​ Beyeler​​ kundër Italisë, cituar më lart, paragrafi​​ 112).​​ 

• Në fund, konkludoj se bazuar në arsyetimin e Gjykatës Themelore dhe asaj Supreme, mund të konstatohet se ato kanë ndjekur një qëllim legjitim dhe janë përpjekur të arsyetojnë mbrojtjen e interesit publik me dëmin e mundshëm të pariparueshëm i cili mund t’u shkaktohet paditësve. Prandaj, konkludoj se gjykatat rregullta kanë ndjekur një qëllim legjitim me rastin e marrjes së vendimeve të kontestuara​​ (shih, Mendimin konkurrues të gjyqtarit​​ Radomir Laban​​ në rastin​​ KI202/21, të​​ 15​​ nëntorit​​ 2022, paragrafët​​ 79-89; shih, më tej,​​ ​​ Mendimin konkurrues të gjyqtarit​​ Radomir Laban​​ në rastin​​ KI143/22,​​ të​​ 24​​ janarit​​ 2023, paragrafët​​ 57-67; shih,​​ gjithashtu,​​ Mendimin​​ mospajtues të gjyqtarit​​ Radomir Laban​​ në rastin​​ KI159/20, të​​ 9​​ dhjetorit​​ 2022, paragrafët​​ 125-133)​​ 

(4)​​ Nëse pengesa ose ndërhyrja në gëzimin paqësor të pronës ka qenë ​​ proporcionale ose e përpjesshme ​​ 

• Për të qenë në pajtim me rregullin e përgjithshëm të përcaktuar në fjalinë e parë të paragrafit të parë të nenit 1 të Protokollit nr. 1, ndërhyrja në të drejtën e gëzimit paqësor të “pronës”, përveç që duhet të jetë e paraparë në ligj dhe në interes publik, duhet të rezultojë me “ekuilibër të drejtë” mes kërkesave të interesit publik të komunitetit dhe​​ kërkesave për të mbrojtur të drejtat themelore të individit​​ (shih rastet e GJEDNJ-së,​​ Beyeler kundër Italisë, cituar më lart, paragrafi 107;​​ Ališić dhe të tjerët kundër Bosnjë e Hercegovinës, Kroacisë, Serbisë dhe Ish-Republikës Jugosllave të Maqedonisë, cituar më lart, paragrafi 108).

• Me fjalë tjera, në rastet që përfshijnë shkelje të pretenduara të nenit 1 të Protokollit nr. 1, Gjykata duhet të vlerësojë nëse për arsye të veprimit apo mosveprimit të​​ shtetit personi në fjalë është dashur të bartë një barrë joproporcionale dhe të tepërt. Gjatë vlerësimit të pajtueshmërisë me këtë kërkesë, Gjykata duhet të bëjë një shqyrtim të gjithëmbarshëm të interesave të ndryshme në këtë çështje, duke pasur parasysh se Konventa ka për qëllim të mbrojë të drejtat të cilat janë “praktike dhe efektive”. Në këtë kontekst, duhet theksuar se pasiguria - qoftë legjislative, administrative apo që lind nga praktikat e aplikuara nga autoritetet, është faktor që merret parasysh gjatë vlerësimit të sjelljes së një​​ shteti (shih rastin e GJEDNJ-së,​​ Broniowski kundër Polonisë, cituar më lart, paragrafi 151).

• Kërkimi i këtij ekuilibri është i mishëruar në tërë Konventën dhe gjithashtu reflektohet në strukturën e nenit 1 të Protokollit nr. 1 (shih rastet e GJEDNJ-së,​​ Sporrong dhe Lönnroth kundër Suedisë, cituar më lart, paragrafi 69;​​ Brumărescu kundër Rumanisë, nr. 28342/95, Aktgjykim i 28 tetorit 1999, paragrafi 78;​​ Saliba kundër Maltës, cituar më lart, paragrafi 36).​​ 

• Çështja nëse është gjetur ekuilibri i drejtë bëhet relevante vetëm pasi të jetë konstatuar se ndërhyrja në fjalë i ka shërbyer interesit publik, e ka plotësuar kërkesën e ligjshmërisë dhe nuk ka qenë arbitrare (shih rastet e GJEDNJ-së,​​ Iatridis kundër Greqisë, cituar më lart, paragrafi 58;​​ Beyeler kundër Italisë, cituar më lart, paragrafi 107).​​ 

• Kjo çështje është më së shpeshti vendimtare për përcaktimin nëse ka pasur shkelje të nenit 1 të Protokollit nr. 1. Gjykata zakonisht kryen një analizë të detajuar të kërkesës së proporcionalitetit, për dallim nga shqyrtimi shumë më i kufizuar i asaj nëse ndërhyrja ka ndodhur në interes publik.​​ 

• Qëllimi i testit të proporcionalitetit është të vërtetojë së pari se si dhe deri në çfarë mase parashtruesit të kërkesës i është kufizuar ushtrimi i të drejtave të prekura nga ndërhyrja e ankimuar dhe cilat ishin pasojat negative të kufizimit të imponuar mbi ushtrimin e të drejtës së parashtruesit të kërkesës në situatën e tij. Pas kësaj, ky ndikim krahasohet me rëndësinë e interesit publik, për shkak të të cilit ka ardhur deri te ndërhyrja​​ (shih, Mendimin konkurrues të gjyqtarit​​ Radomir Laban​​ në rastin​​ KI202/21, të​​ 15​​ nëntorit​​ 2022, paragrafët​​ 90-95;​​ shih,​​ më tej,​​ Mendimin konkurrues të gjyqtarit​​ Radomir Laban​​ në rastin​​ KI143/22,​​ të​​ 24​​ janarit 2023,​​ paragrafët​​ 68-73; shih,​​ gjithashtu,​​ Mendimin mospajtues të gjyqtarit​​ Radomir Laban​​ në rastin​​ KI159/20, të​​ 9​​ dhjetorit​​ 2022, paragrafët​​ 134-139).​​ ​​ 

• Gjatë këtij ekzaminimi, GJEDNJ merr parasysh faktorë të shumtë. Nuk ekziston një listë fikse e faktorëve në fjalë. Ata ndryshojnë nga rasti në rast, varësisht nga gjendja faktike e rastit dhe natyra e ndërhyrjes në fjalë. Faktorët dhe faktet që gjykata merr parasysh gjatë testit mund të jenë si në vijim:​​ a)​​ Faktorët proceduralë;​​ b)​​ Përzgjedhja e masave;​​ c)​​ Çështje substanciale relevante për testin e ekuilibrit të drejtë;​​ d)​​ Aspekte të ndërlidhura me parashtruesin e kërkesës;​​ e)​​ Kompensimi për ndërhyrje në pronësi si element; dhe​​ f)​​ Përfundimi në lidhje me ekuilibrin e drejtë.​​ 

a)​​ Faktorët proceduralë

• Edhe pse neni 1 i Protokollit nr. 1 të KEDNJ-së nuk përmban supozime shprehimore procedurale, i njëjti është interpretuar se nënkupton që individit të prekur nga ndërhyrja në gëzimin paqësor të “pronës” së tij duhet t’i ofrohet mundësi e arsyeshme që të paraqes​​ argumentet e tij/saj para autoriteteve përgjegjëse me qëllim të kontestimit efektiv të masave në fjalë, duke pretenduar, varësisht prej rastit, se janë të paligjshme apo se përbëjnë sjellje arbitrare dhe të paarsyeshme (shih rastet e GJEDNJ-së,​​ G.I.E.M. S.R.L. dhe të tjerët kundër Italisë, nr. 1828/06, Aktgjykim i 28 qershorit 2018, paragrafi 302;​​ AGOSI kundër Mbretërisë së Bashkuar, nr. 9118/80, Aktgjykim i 24 tetorit 1986, paragrafët 55 dhe 58-60).

• Relevant është fakti nëse argumentet e rëndësishme të paraqitura nga parashtruesit e kërkesave ishin ekzaminuar me kujdes nga autoritetet (shih rastet e GJEDNJ-së,​​ Megadat.com SRL kundër Moldavisë, cituar më lart, paragrafi 74;​​ Bistrović kundër Kroacisë, nr. 25774/05, Aktgjykim i 31 gushtit 2007, paragrafi 37).​​ 

• Sa i përket faktorëve proceduralë, vërej se parashtruesi i kërkesës ka pasur mundësinë që ta kontestojë Aktvendimin e Gjykatës Themelore, fillimisht pranë Gjykatës së Apelit dhe më pas​​ pranë​​ Gjykatës Supreme, ashtu që parashtruesi i kërkesës ka pasur një mundësi të arsyeshme për t'i paraqitur argumentet e tij para autoriteteve kompetente me qëllim të kontestimit efektiv të këtyre masave, duke pretenduar, në varësi të rastit, se ato janë të paligjshme ose se ato përbëjnë trajtim arbitrar dhe të paarsyeshëm (shih rastin e GJEDNJ-së,​​ G.I.E.M. S.R.L. dhe të tjerët kundër Italisë, cituar më lart, paragrafi 302). ​​​​ 

• Megjithatë, vërej se është evidente se mungojnë shpjegime kryesore përkitazi me interpretimin dhe zbatimin e nenit​​ 22​​ të LKA-së ndaj rrethanave të rastit konkret sepse: (i)​​ Gjykata Supreme nuk ka peshuar baraspeshën ndërmjet dëmit të pariparueshëm që mund t'i shkaktohej palës paditëse karshi dëmit të pariparueshëm që mund t’i shkaktohej parashtruesit të kërkesës,​​ duke pasur parasysh investimin e tij në infrastrukturën e hidrocentralit; (ii)​​ pse shtyrja e ekzekutimit të vendimit të MEA-së është në mbrojtje të interesit publik dhe nuk është në mbrojtje të interesit publik nëse do të lejohej ekzekutimi i vendimit të MEA-së duke pasur parasysh se hidrocentrali prodhon energji elektrike të ripërtritshme; (iii)​​ mungon arsyetimi shpjegues përse e drejta e​​ GLPS-së​​ dhe Organizatës​​ GAIA​​ për mbrojtje nga dëmi i pariparueshëm e mposhtë të drejtën e parashtruesit të kërkesë po ashtu për mbrojtje nga dëmi i pariparueshëm;​​ dhe, (iv)​​ pse interesi i palës paditëse është edhe interes publik dhe përse e njëjta nuk vlen edhe për parashtruesin e kërkesës.​​ ​​ 

• Për më tepër, vlerësoj se përtej përshkrimit të dispozitave relevante ligjore për shtyrje të ekzekutimit të një akti siç janë përcaktuar në nenin​​ 22​​ të LKA-së, Gjykata Supreme nuk ka shtjelluar asnjë provë apo argument në mbështetje të plotësimit të kritereve ligjore për shtyrjen e ekzekutimit të vendimit të MEA-së​​ (shih, rastet e Gjykatës​​ KI75/21,​​ cituar më lart, paragrafi​​ 86​​ dhe​​ KI202/21,​​ parashtrues​​ “KELKOS Energy”​​ SH.P.K.,​​ Aktgjykim i​​ 29​​ shtatorit​​ 2022).

• Vërej se parashtruesi i kërkesës është pajisur me leje ujore nga autoritetet kompetente të Republikës së Kosovës dhe​​ se i njëjti pëson dëm në vazhdimësi çdo ditë që nuk i lejohet që të ushtrojë veprimtarinë e tij bazuar në lejen që e ka marrë në mënyrë të ligjshme nga autoritetet kompetente të Republikës së Kosovës. Përveç kësaj, vlerësoj se parashtruesi i kërkesës është nën monitorimin e vazhdueshëm nga MEA në lidhje me respektimin e kushteve të lejes dhe revokimin e saj nëse ato nuk respektohen nga parashtruesi i kërkesës.​​ ​​ 

• Rikujtoj se GJEDNJ në jurisprudencën e saj të konsoliduar ka përcaktuar se gjykatat me juridiksion apeli nuk kanë nevojë të japin arsyetim të detajuar në rastet kur pajtohen me arsyetimin e dhënë nga gjykatat e instancës së parë, përkundër faktit që të njëjtat po ashtu duhet të jenë mjaftueshëm të arsyetuara​​ (shih rastin e GJEDNJ-së​​ Garcia Ruiz​​ kundër Spanjës,​​ cituar më lart, paragrafi​​ 31).​​ 

• Vërej se Gjykata Supreme ka prishur Aktvendimin e Gjykatës së Apelit çka nënkupton se Gjykata Supreme ka pasur për obligim që të ofrojë arsyetim specifik për pretendimet qendrore të ngritura nga parashtruesi i kërkesës dhe të shtjelluara nga Gjykata e Apelit, dhe jo t’i shpërfillë ato në tërësi ose që disa prej tyre t’i adresojë vetëm me një arsyetim të shkurtër dhe të përgjithësuar (shih rastin e GJEDNJ-së​​ Lindner​​ dhe​​ Hammermayer​​ kundër Rumanisë,​​ nr. 35671/97,​​ Aktgjykim i​​ 3​​ dhjetorit​​ 2002,​​ paragrafi​​ 33​​ dhe rastin e Gjykatës​​ KI202/21,​​ cituar më lart,​​ paragrafi​​ 135).​​ Rrjedhimisht, ritheksoj se Gjykata Supreme nuk ka mundur që vetëm me një arsyetim të përmbledhur t’i adresojë çështjet thelbësore por ka pasur për obligim që t’i adresojë të gjitha çështjet thelbësore të ngritura nga parashtruesi i kërkesës, çka në rrethanat e rastit konkret nuk ka ndodhur​​ (shih rastin e GJEDNJ-së​​ Hiro Balani​​ kundër Spanjës,​​ cituar më lart, paragrafi​​ 28).

• Konsideroj se Gjykata Supreme në arsyetimin e aktgjykimit të saj nuk ka shtjelluar se:​​ (i)​​ cili është dëmi që i shkaktohet paditësit nga ekzekutimi i aktit të kontestuar dhe pse ai dëm është i pariparueshëm; (ii)​​ cilat prova janë vlerësuar për të konstatuar se shtyrja e ekzekutimit të vendimit të MEA-së nuk është në kundërshtim me interesin publik; (iii)​​ pse parashtruesit të kërkesës nuk i shkaktohet ndonjë dëm i madh apo i pariparueshëm.​​ ​​ ​​ 

• Duke qenë se parashtruesi i kërkesës nuk ka pranuar përgjigje specifike ndaj pretendimeve specifike dhe thelbësore, vlerësoj se aktgjykimi i Gjykatës Supreme nuk i ofron garancitë e mishëruara në nenin 31 të Kushtetutës dhe nenin 6 të KEDNJ-së që ngërthejnë detyrimin që gjykatat të japin arsye të mjaftueshme për vendimet e tyre​​ (shih, rastin e GJEDNJ-së,​​ H.​​ kundër Belgjikës,​​ cituar më lart,​​ paragrafi​​ 53;​​ si dhe shih rastet e Gjykatës​​ KI202/21,​​ cituar më lart;​​ KI230/19,​​ parashtrues​​ Albert Rakipi,​​ cituar më lart,​​ paragrafi​​ 139;​​ dhe​​ KI87/18, parashtrues​​ IF Skadiforsikring,​​ cituar më lart,​​ paragrafi​​ 44).

• Nga të gjitha të cekurat më sipër, konkludoj se përgjatë tërë procedurës pranë gjykatave të rregullta, parashtruesi i kërkesës nuk ka marrë përgjigje adekuate dhe të arsyetuar për çështjet kryesore që parashtruesi i kërkesës i ka deklaruar gjatë gjithë procedurës, gjykatat e rregullta nuk kanë shqyrtuar me kujdes të mjaftueshëm pretendimet kryesore të parashtruesit të kërkesës të cilat janë parashtruar në mënyrë të detajuar më sipër​​ (shih rastet e GJEDNJ-së,​​ Megadat.com SRL​​ kundër Moldavisë, cituar më lart, paragrafi​​ 74;​​ Bistrović​​ kundër Kroacisë, cituar më lart, paragrafi​​ 37).

• Prandaj, konkludoj se sa i përket faktorëve proceduralë, parashtruesi i kërkesës ka pasur një mundësi të arsyeshme për t’i paraqitur argumentet e tij para autoriteteve kompetente me qëllim të kontestimit efektiv të këtyre masave, duke​​ pretenduar, në varësi të rastit, se ato janë të paligjshme ose se ato përbëjnë trajtim arbitrar dhe të paarsyeshëm.​​ Megjithatë, gjatë procedurave, gjykatat e rregullta, e veçanërisht ajo Supreme, nuk i kanë shqyrtuar me kujdes​​ të mjaftueshëm​​ pretendimet kryesore të parashtruesit të kërkesës​​ (shih, Mendimin konkurrues të gjyqtarit​​ Radomir Laban​​ në rastin​​ KI202/21, të​​ 15​​ nëntorit​​ 2022, paragrafët​​ 97-106; shih,​​ më tej,​​ Mendimin konkurrues të gjyqtarit​​ Radomir Laban​​ në rastin​​ KI143/22,​​ të​​ 24​​ janarit​​ 2023,​​ paragrafët​​ 75-80; shih,​​ gjithashtu,​​ Mendimin mospajtues të gjyqtarit​​ Radomir Laban​​ në rastin​​ KI159/20, të​​ 9​​ dhjetorit​​ 2022, paragrafët​​ 141-158).​​ ​​ 

b)​​ Përzgjedhja e masave

• Një nga elementet e testit të ekuilibrit të drejtë është çështja nëse kanë ekzistuar masa të tjera më pak ndërhyrëse që autoritetet publike mund t'i kishin zbatuar në mënyrë të arsyeshme në ndjekje të interesit publik. Megjithatë, ekzistimi i mundshëm i masave të tilla nuk e bën vetvetiu të pajustifikueshëm legjislacionin e kontestuar. Me kusht që legjislatura të qëndrojë brenda kornizave të veta të margjinës së vlerësimit, nuk është në domenin e Gjykatës që të vlerësojë nëse legjislacioni ka përfaqësuar zgjidhjen më të mirë​​ për të trajtuar problemin ose nëse diskrecioni i legjislaturës do duhej ushtruar në një mënyrë tjetër (shih rastin e GJEDNJ-së,​​ James dhe të tjerët kundër Mbretërisë së Bashkuar, cituar më lart, paragrafi ​​ 51;​​ Koufaki dhe Adedy kundër Greqisë, nr. 57657/12, Vendim i 7 majit 2013, paragrafi ​​ 48).​​ 

• Mund të jetë gjithashtu relevante çështja nëse ka qenë e mundshme të arrihet i njëjti qëllim përmes masave më pak ndërhyrëse mbi të drejtat e parashtruesit të kërkesës dhe nëse autoritetet e kanë shqyrtuar mundësinë e aplikimit të këtyre zgjidhjeve më pak ndërhyrëse (shih rastet e GJEDNJ-së,​​ OAO Neftyanaya Kompaniya Yukos kundër Rusisë, nr. 14902/04, Aktgjykim i 8 marsit 2012, paragrafët 651-654;​​ Vaskrsić kundër Sllovenisë, nr. 31371/12, Aktgjykim i 25 korrikut 2017, paragrafi 83).​​ 

• Në rastin para meje, konsideroj se ndërhyrja në gëzimin paqësor të pronës, përkatësisht masa e kontrollit të shfrytëzimit të pronës ka qenë një situatë momentale e cila ka kërkuar ndërprerjen e aktivitetit afarist të parashtruesit të kërkesës dhe se nuk ka pasur masa të tjera alternative, sepse pas vendimit për shtyrjen e ekzekutimit të vendimeve të​​ të​​ paditurve dhe pezullimin e ekzekutimit të​​ lejes ujore​​ për një periudhë të pacaktuar, parashtruesi i kërkesës ka qenë i detyruar të ndërpresë me efekt të menjëhershëm veprimtarinë e tij ekonomike, duke u përballur me një barrë të rëndë dhe joproporcionale.

• Prandaj, konkludoj se nuk ka pasur masa të tjera alternative, masa të tilla që janë më pak ndërhyrëse, të cilat autoritetet publike kanë mundur t’i zbatonin në mënyrë të arsyeshme në ndjekje të interesit publik. Konsideroj se i njëjti qëllim mund të ishte arritur nga një ndërhyrje më pak invazive në të drejtat e parashtruesit të kërkesës, si dhe se autoritetet nuk shqyrtuan mundësinë e zbatimit të atyre zgjidhjeve më pak ndërhyrëse​​ (shih, Mendimin konkurrues​​ të​​ gjyqtarit​​ Radomir Laban​​ në rastin​​ KI202/21, të​​ 15​​ nëntorit​​ 2022, paragrafët​​ 107-110; shih,​​ më tej,​​ Mendimin konkurrues të gjyqtarit​​ Radomir Laban​​ në rastin​​ KI143/22,​​ të​​ 24​​ janarit​​ 2023, paragrafët​​ 81-84; shih,​​ gjithashtu,​​ Mendimin mospajtues të gjyqtarit​​ Radomir Laban​​ në rastin​​ KI159/20, të​​ 9​​ dhjetorit​​ 2022, paragrafët​​ 159-162).​​ ​​ 

c) ​​ Çështje substanciale relevante për testin e ekuilibrit të drejtë

• Në rastet e caktuara, testi i ekuilibrit të drejtë përfshin pyetjen nëse rrethanat e posaçme të rastit janë marrë mjaftueshëm parasysh nga shteti, duke përfshirë çështjen nëse masat e kontrollit të “pronës” ose një pjese të pronës, ndikuan në vlerën ose përfitimin e pjesës që nuk mbulohet nga masat që i përkasin parashtruesit të kërkesës (shih rastet e GJEDNJ-së,​​ Azas kundër Greqisë, nr. 50824, Aktgjykim i 21 majit 2002, paragrafët 51-53;​​ Interoliva ABEE kundër Greqisë,​​ nr. 58642/00, Aktgjykim i 10 tetorit 2003, paragrafët 31-33).

• Vërej se në rastin konkret, kemi të bëjmë me masën e kontrollit të “pronës”, duke pasur parasysh se parashtruesit të kërkesës i është pezulluar leja e vlefshme ujore, por nuk ka pasur konfiskim të pronës, siç janë hidrocentralet dhe pajisjet në to, si dhe hapësira e punës së parashtruesit të kërkesës

• Prandaj, Gjykata konkludon se pavarësisht nga fakti se nuk ka pasur konfiskim të pronës, por vetëm një masë kontrolli të “pronës”, me vendimin për shtyrjen e zbatimit të vendimeve të të paditurve dhe pezullimin e zbatimit të lejes ujore për një periudhë të pacaktuar, parashtruesi i kërkesës pësoi një zvogëlim të vlerës së pjesëve të pronës që nuk ishte përfshirë me masat, për shkak se të njëjtat e humbën funksionin bazë që kishin sa ekzistonte licenca​​ (shih, Mendimin konkurrues të gjyqtarit​​ Radomir Laban​​ në rastin​​ KI202/21, të​​ 15​​ nëntorit​​ 2022, paragrafët​​ 111-113; shih,​​ më tej,​​ Mendimin konkurrues të gjyqtarit​​ Radomir Laban​​ në rastin​​ KI143/22,​​ të​​ 24​​ janarit​​ 2023, paragrafët​​ 85-87; shih,​​ gjithashtu,​​ Mendimin mospajtues të gjyqtarit​​ Radomir Laban​​ në rastin​​ KI159/20, të​​ 9​​ dhjetorit​​ 2022, paragrafët​​ 163-165).​​ ​​ 

d)​​ Aspekte të ndërlidhura me parashtruesin e kërkesës

• Një nga faktorët më të rëndësishëm për testin e ekuilibrit sipas nenit 1 të Protokollit nr. 1 është të shihet nëse parashtruesi i kërkesës është përpjekur që të shfrytëzojë ndonjë dobësi apo boshllëk në sistemin juridik (shih rastet​​ National & Provincial Building Society, Leeds Permanent Building Society dhe Yorkshire Building Society kundër Mbretërisë së Bashkuar, nr. 117/1996/736/933-935, Aktgjykim i 23 tetorit 1997, paragrafi 109). Ngjashëm, në rastin​​ G.I.E.M. S.R.L. dhe të tjerët kundër Italisë,​​ cituar më lart, paragrafi 301, Gjykata ka theksuar se shkalla e fajësisë apo neglizhencës së parashtruesit të kërkesës ose, së paku, marrëdhënia ndërmjet sjelljes së tyre dhe shkeljes në fjalë, mund të merret parasysh me qëllim të vlerësimit nëse revokimi ishte i arsyeshëm.

• Përkitazi me këtë faktor​​ nga shkresat e lëndës​​ nuk ka asnjë informatë as nga autoritetet shtetërore kompetente dhe as nga gjykatat e rregullta se parashtruesi i kërkesës ka shkelur ndonjë normë, është dënuar ose është përpjekur të përfitojë nga ndonjë mangësi apo zbrazëti në rendin juridik​​ (shih rastin e GJEDNJ-së,​​ OGIS-Institut Stanislas, OGEC Saint-Pie X dhe Blanche de Castille dhe të tjerë kundër Francës, nr. 42219/98 et​​ 54563/00, Aktgjykim i 27 gushtit​​ 2004, paragrafët 69 dhe 71).

• Prandaj, konstatoj se parashtruesi i kërkesës nuk u përpoq të përfitojë nga ndonjë mangësi ose zbrazëti në rendin ligjor, se parashtruesi i kërkesës nuk u shpall fajtor ose neglizhues në shfrytëzimin e lejes ujore në mënyrë të paligjshme, në mënyrë që Gjykata të mund të vlerësojë se ishte e nevojshme masa e kontrollit të përdorimit të pronës​​ (shih, Mendimin konkurrues të gjyqtarit Radomir Laban​​ në rastin​​ KI202/21, të​​ 15​​ nëntorit​​ 2022, paragrafët​​ 114-116; shih,​​ më tej,​​ Mendimin konkurrues të gjyqtarit​​ Radomir Laban​​ në rastin​​ KI143/22,​​ të​​ 24​​ janarit​​ 2023, paragrafët​​ 88-90; shih, gjithashtu, Mendimin mospajtues të gjyqtarit​​ Radomir Laban​​ në rastin​​ KI159/20, të​​ 9​​ dhjetorit​​ 2022, paragrafët​​ 166-168).​​ 

e)​​ Kompensimi për ndërhyrje në pronësi si element i ekuilibrit të drejtë

• Kushtet e kompensimit janë esenciale për vlerësimin e ekuilibrit të drejtë, dhe posaçërisht çështja nëse masa e kontestuar u imponon parashtruesve të kërkesës barrë të paarsyeshme (shih rastet e GJEDNJ-së,​​ Manastiret e shenjta kundër Greqisë, nr. 13092/87 dhe 13984/88, Aktgjykim i 9 dhjetorit 1994, paragrafi 71;​​ Platakou kundër Greqisë, nr. 38460/97, Aktgjykim i 5 dhjetorit 2001, paragrafi 55). Marrja e pronës pa pagesën e një shume të arsyeshme në lidhje me vlerën e saj, zakonisht përbën ndërhyrje joproporcionale dhe mungesa e plotë e kompensimit mund të konsiderohet e justifikueshme në bazë të nenit 1 të Protokollit nr. 1, vetëm në rrethana të jashtëzakonshme.

• Ajo që është e arsyeshme varet nga rrethanat e secilit rast, por një margjinë e gjerë e vlerësimit është e mundshme gjatë vlerësimit të shumës së kompensimit. Autorizimi i Gjykatës për rishikim kufizohet në vlerësimin nëse përzgjedhja e kushteve të kompensimit bie jashtë margjinës së vlerësimit të shtetit në këtë domen (shih rastin e GJEDNJ-së,​​ James dhe të tjerët kundër Mbretërisë së Bashkuar, cituar më lart, paragrafi 54). Gjykata do të respektojë vlerësimin e pushtetit legjislativ lidhur me kompensimin për ndërhyrje në të drejtën për gëzimin paqësor të “pronës” përveç rasteve kur është qartazi pa bazë të arsyeshme (shih rastin e GJEDNJ-së,​​ Lithgow dhe të tjerët kundër Mbretërisë së Bashkuar, nr. 9006/80; 9262/81; 9263/81; 9265/81; 9266/81; 9313/81; 9405/81, Aktgjykim i 8 korrikut 1986, paragrafi ​​ 122).

• Në rastin konkret, vërej se masat e kontrollit të pronës ndodhën pa asnjë kompensim për parashtruesin e kërkesës. Masat e kontrollit të pronës pa pagesën e një shume të arsyeshme në lidhje me vlerën e saj zakonisht do të përbëjnë ndërhyrje të paarsyeshme dhe një mungesë e plotë e kompensimit mund të konsiderohet e justifikuar në bazë të nenit 1 të Protokollit nr. 1 vetëm në rrethana të jashtëzakonshme.

• Vërej se sipas sistemeve juridike të Shteteve Kontraktuese, marrja e pronës për interes publik pa pagesën e kompensimit trajtohet si e justifikuar vetëm në rrethana të jashtëzakonshme që nuk janë relevante për qëllimet aktuale. Për sa i përket nenit 1 (P1-1), mbrojtja e të drejtave pronësore që ai parashikon do të ishte në masë të madhe iluzore dhe joefektive në mungesë të ndonjë parimi ekuivalent​​ (shih rastin e GJEDNJ-së, Lithgow dhe të tjerët kundër Mbretërisë së Bashkuar, cituar më lart, paragrafi 122).

• Prandaj, konkudoj se ndërhyrja në gëzimin paqësor të pronës së parashtruesit të kërkesës ka ndodhur pa pagesën e asnjë kompensimi parashtruesit të kërkesës, prandaj nuk është arritur një “ekuilibër i drejtë” ndërmjet kërkesave të interesit të përgjithshëm të komunitetit dhe kërkesave të mbrojtjes së të drejtave themelore të individit​​ (shih Mendimin konkurrues të gjyqtarit​​ Radomir Laban​​ në rastin​​ KI202/21, të​​ 15​​ nëntorit​​ 2022, paragrafët​​ 117-121; shih,​​ më tej,​​ Mendimin konkurrues të gjyqtarit​​ Radomir Laban​​ në rastin​​ KI143/22,​​ të​​ 24​​ janarit​​ 2023,​​ paragrafët​​ 91-95; shih,​​ gjithashtu,​​ Mendimin mospajtues të gjyqtarit​​ Radomir Laban​​ në rastin​​ KI159/20, të​​ 9​​ dhjetorit​​ 2022, paragrafët​​ 169-173).​​ ​​ 

f)​​ Përfundim lidhur me ekuilibrin e drejtë

• Prandaj, unë si gjyqtar individual lidhur me​​ faktorët që merren parasysh për të përcaktuar nëse ka pasur proporcionalitet në ndërhyrjen në të drejtën për gëzimin paqësor të pronës së parashtruesit të kërkesës, konstatoj:

• se sa i përket faktorëve proceduralë, parashtruesi i kërkesës ka pasur një mundësi të arsyeshme për t’i paraqitur argumentet e tij para autoriteteve kompetente me qëllim të kontestimit efektiv të këtyre masave, duke pretenduar, në varësi të rastit, se ato janë të paligjshme ose që përbëjnë trajtim arbitrar dhe të paarsyeshëm.​​ Megjithatë, gjatë procedurës gjykatat e rregullta, e veçanërisht Gjykata Supreme, nuk i kanë shqyrtuar me kujdes të mjaftueshëm pretendimet kryesore të parashtruesit të kërkesës;​​ 

• se nuk kanë ekzistuar masa të tjera alternative, masa më pak ndërhyrëse që autoritetet publike do të mund t’i zbatonin në mënyrë të arsyeshme për realizimin e interesit publik. Konsideroj​​ se i njëjti qëllim mund të ishte arritur nga një ndërhyrje më pak invazive në të drejtat e parashtruesit të kërkesës, si dhe se autoritetet nuk shqyrtuan mundësinë e zbatimit të atyre zgjidhjeve më pak ndërhyrëse;

• se pavarësisht faktit se nuk ka pasur konfiskim të pronës, por vetëm një masë kontrolli të “pronës“, me vendimin për shtyrjen e zbatimit të vendimeve të të paditurve dhe pezullimin e lejes ujore për një afat të pacaktuar, parashtruesi i kërkesës ka pësuar një zvogëlim të vlerës së pjesëve​​ të pronës që nuk ishin përfshirë me masat, sepse të njëjtat e humbën funksionin bazë që kishin përderisa ekzistonte licenca; ​​ 

• se parashtruesi i kërkesës nuk është përpjekur të përfitojë nga asnjë mangësi​​ ose​​ zbrazëti në rendin ligjor, se parashtruesi kërkesës nuk është shpallur fajtor​​ apo neglizhues në përdorimin e paligjshëm të lejes ujore, në mënyrë që gjykata të vlerësojë se masa e kontrollit të përdorimit të pronës ishte e nevojshme;

• se ndërhyrja në gëzimin paqësor të pronës së parashtruesit të kërkesës ka ndodhur pa paguar asnjë kompensim për parashtruesin e kërkesës, prandaj nuk është arritur një “ekuilibër i drejtë” ndërmjet kërkesave të interesit të përgjithshëm të komunitetit dhe kërkesave për mbrojtjen e të drejtave themelore të individit.​​ 

• E rikujtoj rastin e GJEDNJ-së,​​ Megadat.Com SRL kundër Moldavisë,​​ ku GJEDNJ kishte vlerësuar se masa e ndërmarrë nga autoritetet shtetërore ndaj kompanisë që ofronte shërbime të internetit, ishte aq e rëndë sa që kompania në fjalë ishte detyruar që ta mbyllte biznesin dhe të shiste të gjitha asetet e saj brenda një kohe shumë të shkurtër (shih rastin e GJEDNJ-së,​​ Megadat.com SRL kundër Moldavisë,​​ cituar më lart, paragrafi​​ 69).

• Në fund, vërej se vendimi për shtyrjen e ekzekutimit të vendimeve të të paditurve dhe pezullimin e ekzekutimit të lejes ujore për një periudhë të pacaktuar ishte i menjëhershëm dhe nuk parashihte asnjë kompensim apo periudhë kalimtare që do t'i mundësonte parashtruesit të kërkesës të vazhdojë me ushtrimin e veprimtarisë së tij ekonomike.

• Për sa më sipër, konkludoj se në dritën e rrethanave mbizotëruese të rastit dhe vlerësimeve të përshkruara më parë, ndërhyrja në gëzimin paqësor të pronës në rastin e parashtruesit të kërkesës nuk ishte proporcionale sepse ai kishte pritshmëri legjitime që gjatë periudhës për të cilën kishte lejen e​​ vlefshme​​ ujore​​ do të​​ jetë​​ në gjendje të ushtrojë veprimtarinë e tij ekonomike dhe të gëzojë në mënyrë të qetë pronën e tij.

• Rrjedhimisht, konkludoj​​ se përmes Aktgjykimit të kontestuar​​ [ARJ.​​ nr. 116/2021]​​ ​​ të Gjykatës Supreme dhe Aktvendimit​​ [A.​​ nr. 472/2021]​​ të Gjykatës Themelore të​​ 17​​ qershorit​​ 2021,​​ përmes të cilave është nxjerrë vendimi për shtyrjen e ekzekutimit të vendimeve të të paditurve dhe pezullimin e ekzekutimit të lejes ujore për një periudhë të pacaktuar është shkelur e drejta e parashtruesit të kërkesës për gëzimin paqësor të pronës, e garantuar me nenin 46 të Kushtetutës dhe nenin 1 të Protokollit nr. 1 të KEDNJ-së​​ (shih, Mendimin konkurrues të gjyqtarit​​ Radomir Laban​​ në rastin​​ KI202/21, të​​ 15​​ nëntorit​​ 2022, paragrafi​​ 126; shih,​​ më tej,​​ Mendimin konkurrues të gjyqtarit​​ Radomir Laban​​ në rastin​​ KI143/22,​​ të​​ 24​​ janarit​​ 2023,​​ paragrafët​​ 100-101; shih,​​ gjithashtu,​​ Mendimin mospajtues të gjyqtarit​​ Radomir Laban​​ në rastin​​ KI159/20, të​​ 9​​ dhjetorit​​ 2022, paragrafi​​ 183).​​ ​​ 

• Konkludim në lidhje me shkeljet e pretenduara të të drejtave të parashtruesit të kërkesës​​ ​​ 

• Bazuar në sa më sipër, dhe duke marrë parasysh shqyrtimet e pretendimeve të parashtruesit në kërkesën e tij:

• PAJTOHEM ME mendimin e shumicës se janë të bazuara pretendimet ​​ e parashtruesit të kërkesës se përmes Aktgjykimit​​ [ARJ.​​ nr. 116/2021]​​ të Gjykatës Supreme të​​ 28​​ tetorit​​ 2021​​ i është shkelur e drejta për gjykim të drejtë dhe të paanshëm e garantuar me nenin 31​​ të Kushtetutës në lidhje me nenin​​ 6​​ të KEDNJ-së, siç arsyetohet në Aktgjykim.

• KONSIDEROJ se janë të bazuara pretendimet e parashtruesit të kërkesës se përmes Aktgjykimit të kontestuar​​ [ARJ.​​ nr. 116/2021]​​ të Gjykatës Supreme të​​ 28​​ tetorit​​ 2021​​ dhe Aktvendimit​​ [A.​​ nr. 472/2021]​​ të Gjykatës Themelore të​​ 17​​ qershorit 2021,​​ përmes të cilave është nxjerrë vendimi për shtyrjen e ekzekutimit të vendimeve të të paditurve dhe pezullimin e ekzekutimit të lejes ujore për një periudhë të pacaktuar, është shkelur e drejta e parashtruesit​​ të kërkesës​​ për gëzimin​​ paqësor të pronës, e garantuar me nenin​​ 46​​ të Kushtetutës dhe nenin​​ 1​​ të Protokollit nr.​​ 1​​ të KEDNJ-së.​​ ​​ 

• PAJTOHEM​​ me​​ mendimin e shumicës që TË SHPALLË të pavlefshëm Aktgjykimin​​ [ARJ.​​ nr. 116/2021]​​ e​​ Gjykatës Supreme të​​ 28​​ tetorit​​ 2021.​​ 

• KONSIDEROJ​​ SE është dashur TË SHPALLET JOKUSHTETUES edhe Aktvendimi​​ [A.​​ nr. 472/2021]​​ i Gjykatës Themelore​​ i​​ 17​​ qershorit 2021.

Mendimi konkurrues është paraqitur nga gjyqtari:

Radomir Laban,​​ gjyqtar​​ 

_________________

Më​​ 19​​ janar​​ 2023​​ në Prishtinë.​​