Vendim
Prishtinë, më 4 mars 2024
Nr. Ref.:RK 2386/24
VENDIM PËR REFUZIM TË KËRKESËS
në
rastin nr. KI143/23
Parashtrues
Pjetër Boçi
Kërkesë për rishqyrtimin e Aktvendimit për papranueshmëri nr. KI86/22 të Gjykatës Kushtetuese të 9 qershorit 2023
GJYKATA KUSHTETUESE E REPUBLIKËS SË KOSOVËS
e përbërë nga:
Gresa Caka-Nimani, kryetare
Bajram Ljatifi, zëvendëskryetar
Selvete Gërxhaliu-Krasniqi, gjyqtare
Safet Hoxha, gjyqtar
Radomir Laban, gjyqtar
Remzie Istrefi-Peci, gjyqtare
Nexhmi Rexhepi, gjyqtar dhe
Enver Peci, gjyqtar
Parashtruesi i kërkesës
Kërkesa është dorëzuar nga Pjetër Boçi, me vendbanim në Prizren (në tekstin e mëtejmë: parashtruesi i kërkesës).
Vendimi i kontestuar
Parashtruesi i kërkesës kërkon “rishqyrtimin e serishëm” të Aktvendimit për papranueshmëri në rastin KI86/22 të Gjykatës Kushtetuese të Republikës së Kosovës (në tekstin e mëtejmë: Gjykata) të 9 qershorit 2023, në lidhje me Aktgjykimin [Pml. nr. 151/2022], të 14 prillit 2022, të Gjykatës Supreme të Kosovës (në tekstin e mëtejmë: Gjykata Supreme).
Objekti i çështjes
Objekti i çështjes ka të bëjë me kërkesën e parashtruesit për rishikimin e pretendimeve të tij të ngritura në kërkesën e mëparshme KI86/22, por edhe rishqyrtimin e Aktvendimit për papranueshmëri të Gjykatës Kushtetuese, të 9 qershorit 2023, përmes të cilit pretendon se i janë shkelur të drejtat dhe liritë themelore të tij të garantuara me nenin 24 [Barazia para Ligjit] të Kushtetutës së Republikës së Kosovës (në tekstin e mëtejmë: Kushtetuta).
Baza juridike
Kërkesa bazohet në paragrafët 1 dhe 7 të nenit 113 [Jurisdiksioni dhe Palët e Autorizuara] të Kushtetutës, në nenet 22 (Procedimi i kërkesës) dhe 47 (Kërkesa Individuale) të Ligjit nr. 03/L-121 për Gjykatën Kushtetuese të Republikës së Kosovës (në tekstin e mëtejmë: Ligji) dhe në rregullin 25 (Parashtrimi i kërkesave dhe përgjigjeve të Rregullores së punës të Gjykatës Kushtetuese të Republikës së Kosovës (në tekstin e mëtejmë: Rregullorja e punës).
Procedura në Gjykatën Kushtetuese
Më 3 korrik 2023, parashtruesi i kërkesës e dorëzoi kërkesën në Gjykatën Kushtetuese të Republikës së Kosovës (në tekstin e mëtejmë: Gjykata).
Më 13 korrik 2023, Kryetarja e Gjykatës me Vendimin GJR. KI143/23, caktoi gjyqtaren Remzie Istrefi – Peci gjyqtare raportuese dhe me Vendimin KSH. KI143/23, caktoi anëtarët e Kolegjit shqyrtues, të përbërë nga gjyqtarët: Selvete Gërxhaliu – Krasniqi (kryesuese), Safet Hoxha dhe Radomir Laban (anëtarë).
Më 14 korrik 2023, Gjykata e njoftoi parashtruesin e kërkesës për regjistrimin e kërkesës.
Më 30 janar 2024, Gjykata shqyrtoi raportin paraprak të propozuar nga gjyqtarja raportuese dhe njëzëri i rekomandoi Gjykatës refuzimin e kërkesës.
Përmbledhje e fakteve
Parashtruesi i kërkesës parashtron për herë të katërt kërkesë në Gjykatë. Më parë kishte parashtruar kërkesat KI76/18, KI21/19 dhe KI86/22. Nëpërmjet kërkesës së parë KI76/18, parashtruesi i kërkesës kontestoi Aktgjykimin [PML. nr. 279/2017], e 26 marsit 2018, të Gjykatës Supreme dhe Aktvendimin [PN. nr. 462/2018], e 28 majit 2018, të Gjykatës së Apelit. Këtë kërkesë Gjykata, e kishte deklaruar të papranueshme me Aktvendimin e 22 nëntorit 2018, pasi kishte analizuar pretendimet përkitazi me (i) ngritjen e aktakuzës pa bazë ligjore, (ii) aplikimin e dispozitave penale në lidhje me definimin e termit “person zyrtar” dhe (iii) me rishikimin e procedurës penale. Ndërsa, nëpërmjet kërkesës së dytë KI21/19, parashtruesi i kërkesës kishte kërkuar interpretimin e legjislacionit relevant në lidhje me definimin e “pozitës zyrtare” në lidhje me të cilën Gjykata vendosi më 27 maj 2019, me Aktvendim për papranueshmëri, pasi konstatoi se i njëjti nuk ishte palë e autorizuar për të ngritur një kërkesë të tillë në Gjykatë. Ndërsa lidhur me kërkesën KI86/22, Gjykata pasi shqyrtoi të gjitha pretendimet e parashtruesit të kërkesës vendosi si në vijim: (i) pretendimet e parashtruesit të kërkesës për shkelje të nenit 24 të Kushtetutës, i takojnë kategorisë së pretendimeve “të pambështetura ose të paarsyetuara”, andaj si të tilla, në baza kushtetuese të njëjtat duhet shpallur qartazi të pabazuara; (ii) kërkesa e parashtruesit të kërkesës përkitazi me pretendimet për parregullsi të procesit gjyqësor, në ndërlidhje me kërkesën e II-dytë për rishikimin e procedurës penale, deklarohet e pasafatshme në pajtim me nenin 49 të Ligjit dhe rregullin 39 (1, c) të Rregullores së punës; dhe (iii) kërkesa e parashtruesit të kërkesës përkitazi me pretendimet për parregullsinë e procesit gjyqësor, në ndërlidhje me kërkesën e tretë për rishikimin e procedurës penale nuk është ratione materiae, në pajtim me Kushtetutën.
Faktet e kërkesës së tanishme KI143/23, janë të reflektuara në detaje në rastin KI86/22 (shih rastin KI86/22, parashtrues Pjetër Boçi, Aktvendim për Papranueshmëri, i 9 qershorit 2023, paragrafët 12-39).
Pretendimet e parashtruesit të kërkesës
Parashtruesi i kërkesës pretendon se Gjykata Kushtetuese në Aktvendimin për papranueshmëri në rastin KI86/22, të 9 qershorit 2023, shkel të drejtat dhe liritë themelore të tij, të garantuara me nenin 24 [Barazia para Ligjit] të Kushtetutës.
Parashtruesi i kërkesës duke u referuar në procedurat gjyqësore të kontestuara dhe të shqyrtuara në rastin KI86/22, të 9 qershorit 2023, ripërsëritë pretendimet sikurse në rastin KI86/22, respektivisht rithekson pretendime përkitazi me ''parregullsinë e procesit" dhe specifikisht kualifikimit të "Person zyrtar", si dhe pretendimet përkitazi me ''barazinë para ligjit" duke pretenduar se gjatë procesit gjyqësor është ndjerë i diskriminuar.
Parashtruesi i kërkesës, ndër tjerash, thekson “[...], kur unë ankimoj aktgjykimin e fundit të cilin e pranon edhe Gjykata (Pml.nr.151/2022) datë 14.04.2022 dhe merret me pml e mëhershme i cili nuk është objekt i kërkesës”.
Parashtruesi i kërkesës pohon se i ka shterur të gjitha mjetet juridike, duke theksuar “... për të mos thënë se jam munduar me çdo kusht e me çdo formë të bëhet interpretimi i ligjit për personin zyrtar, kjo është bërë me qëllimin e nxjerrjes në dritë të shkeljes së ligjit penal, sepse kodi penal i Kosovës e përcakton saktësisht se kush është person zyrtar, edhe me kodin e vjetër penal edhe me kodin e ri penal. Të njëjtën punë e ka bërë edhe Gjykata Themelore në Prizren duke bërë shkelje esenciale të ligjit penal nga neni 384 paragrafi 1 i këtij kodi”.
Tutje, duke përsëritur pretendimet, parashtruesi i kërkesës thekson: “... unë i referohem nenit 384, ku unë nuk jam as nuk mundem të akuzohem për një vepër penale se nuk jam person zyrtar, pra nuk i ka elementet as formale e jo përmbajtësore të personit të akuzuar, kjo është arsyeja që unë kërkoj në fillim Gjykata Kushtetuese të shikojë se a mund të jetë person zyrtar një i qytetar i vetëpunësuar duke ditur se personi zyrtar mund të jetë çdo person i zgjedhur, i emëruar, i autorizuar, nga një organ kompetent për të kryer apo mos kryer sipas detyrës zyrtare. Unë për të argumentuar se nuk jam person zyrtar i kam kërkuar Prokurorisë Themelore në Prizren disa herë certifikatën e biznesit individual ta dërgojë në zyrën e forenzikes dhe të përcaktohet se ky biznes është biznes individual dhe jo organizatë biznesi siç e trajton kolegji gjykues i Gjykatës Themelore në Prizren ...”.
Në fund, parashtruesi i kërkesës kërkon nga Gjykata, si në vijim: “unë kërkoj që identiteti im të bëhet publik, mundësisht unë kërkoj të argumentoj çfarë nuk është sqaruar hollësisht në sqarimin e shkeljeve kushtetuese të bëra në të gjitha fazat e gjykimit si në Gjykatat e rregullta ashtu edhe në Gjykatën Kushtetuese”.
Dispozitat përkatëse kushtetuese dhe ligjore
KUSHTETUTA E REPUBLIKËS SË KOSOVËS
Neni 24
[Barazia para Ligjit]
“1. Të gjithë janë të barabartë para ligjit. Çdokush gëzon të drejtën e mbrojtjes së barabartë ligjore, pa diskriminim.
2. Askush nuk mund të diskriminohet në bazë të racës, ngjyrës, gjinisë, gjuhës, fesë, mendimeve politike ose të tjera, prejardhjes kombëtare a shoqërore, lidhjes me ndonjë komunitet, pronës, gjendjes ekonomike, sociale, orientimit seksual, lindjes, aftësisë së kufizuar ose ndonjë statusi tjetër personal.
3. Parimet e mbrojtjes së barabartë ligjore nuk parandalojnë vënien e masave të nevojshme për mbrojtjen dhe përparimin e të drejtave të individëve dhe grupeve që janë në pozitë të pabarabartë. Masat e tilla do të zbatohen vetëm derisa të arrihet qëllimi për të cilin janë vënë ato”.
Vlerësimi i pranueshmërisë së kërkesës
Gjykata së pari do të shqyrtojë nëse kërkesa i ka përmbushur kriteret e pranueshmërisë, të përcaktuara me Kushtetutë, të parashikuara me Ligj dhe të specifikuara më tej me Rregullore të punës.
Në këtë drejtim, bazuar në shkresat e lëndës, parashtruesi i kërkesës me anë të dokumenteve të paraqitura nuk paraqet ndonjë fakt të ri të rëndësishëm për marrjen e një vendimi të ri, por thjesht paraqet një përpjekje tjetër të parashtruesit të kërkesës për të kërkuar nga Gjykata të njëjtin vlerësim kushtetues të cilin ai tashmë e kishte kërkuar në kërkesën KI86/22.
Në lidhje me këtë, Gjykata i referohet nenit 116 (1) [Efekti Juridik i Vendimeve] të Kushtetutës, i cili parasheh:
“Vendimet e Gjykatës Kushtetuese janë të detyrueshme për gjyqësorin dhe të gjithë personat dhe institucionet e Republikës së Kosovës”
Për më tepër, Gjykata i referohet edhe rregullit 54 (2) (b) të Rregullores së punës, i cili parasheh:
“[...]
(2) Gjykata mund të vendosë ta refuzojë një kërkesë me procedurë të shkurtër në qoftë se:
[...]
(b) kërkesa është përsëritje e një kërkese të mëparshme të vendosur nga Gjykata; ose
[...]”
Bazuar në rregullin e lartcekur dhe në praktikën gjyqësore të Gjykatës Evropiane për të Drejtat e Njeriut (në tekstin e mëtejmë: GJEDNJ), por edhe vetë praktikën gjyqësore të Gjykatës, i mundëson kësaj të fundit, që të shpallë një kërkesë të papranueshme pas vlerësimit se kërkesa në fjalë është vetëm një përsëritje e kërkesës së njëjtë me rastin e mëparshëm.
Gjykata rikujton se kërkesa aktuale me nr. KI143/23, e paraqitur nga i njëjti parashtrues, dhe është vetëm një përsëritje e kërkesës së njëjtë të mëparshme nr. KI86/22 të paraqitur nga po i njëjti parashtrues, të cilën Gjykata e shpalli të papranueshme në pajtim me rregullin 39, (1, c), (2) dhe (3, b) të Rregullores së punës.
Gjykata rikujton se ankimimi individual në kuptim të nenit 113 (7) të Kushtetutës nuk duhet të shikohet nga parashtruesit e kërkesës si një mundësi për të kërkuar në mënyrë të përsëritur nga Gjykata që të rihapë vendimet e saj dhe të gjykojë sërish çështjen e njëjtë (shih rastet e Gjykatës: rasti KI105/16, parashtrues Feti Gashi, Vendimi për refuzim të kërkesës, të datës 10 maj 2017, paragrafi 21).
Në këtë drejtim, Gjykata rikujton se vendimet e saj janë vendime të formës së prerë dhe të detyrueshme për gjyqësorin, të gjithë personat fizikë apo juridikë dhe të gjitha institucionet e Republikës së Kosovës (shih rastet e Gjykatës, rastin KI102/19, parashtrues Bedri Gashi, Vendimi për refuzim të kërkesës, të datës 5 dhjetor 2019, paragrafët 21 dhe 22, dhe gjithashtu, rastin KI96/23, parashtrues Muhamet Miftari, Vendim për refuzim të kërkesës, të 18 shtatorit 2023, paragrafi 37).
Bazuar në elaborimin e mësipërm, Gjykata vjen në përfundim se kërkesa e parashtruesit, në fakt, është kërkesë për përsëritjen e një procedurë të mëhershme, për të cilën Gjykata tanimë ka vendosur. Prandaj, në përputhje me rregullin 54 (2) (b), Gjykata vendosi që kërkesa me numër KI143/23 të refuzohet me procedurë të shkurtër.
PËR KËTO ARSYE
Gjykata Kushtetuese e Kosovës, në pajtim me nenin 116 (1) të Kushtetutës, nenet 20 dhe 47 të Ligjit dhe rregullin 54 (2) (b) të Rregullores së punës, në seancën e mbajtur më 30 janar 2024, njëzëri
VENDOS
TË REFUZOJË kërkesën;
T’UA KUMTOJË këtë Vendim palëve;
TË PUBLIKOJË këtë Vendim në Gazetën Zyrtare në pajtim me nenin 20.4 të Ligjit;
Ky Vendim hyn në fuqi në ditën e shpalljes në Gazetën Zyrtare të Republikës së Kosovës në pajtim me paragrafin 5 të nenit 20 të Ligjit;
Gjyqtarja raportuese Kryetarja e Gjykatës Kushtetuese
Remzie Istrefi Peci Gresa Caka-Nimani
Pjetër Boçi
KI - Kërkesë individuale
Vendim
Vendim për refuzim të kërkesës