Aktvendim për papranueshmëri

Kërkesë për vlerësim të Aktgjykimit të Gjykatës së Qarkut në Gjilan P. Nr. 162/2003, të datës 7 prill 2005, aktgjykimeve të Gjykatës Supreme të Kosovës në Prishtinë Ap. Nr. 393/2006 të datës 20 maj 2008, Ap. Nr. 04/2009 të datës 16 shtator 2009 dhe PKL Nr. 30/2010 të datës 1 shkurt 2011.

Nr. të lëndës KI 81/11

Parashtruesit: Burim Ramadani dhe Arsim Ramadani

Parashtruesit paraqitën kërkesën bazuar në Nenin 113.7 të Kushtetutës së Kosovës duke pohuar se të drejtat dhe liritë e tyre kushtetuese janë cenuar me aktgjykimet e gjykatave të rregullta të të gjitha shkallëve, me ç’rast parashtruesit ishin dënuar me burg lidhur me akuzat mes tjerash për kryerje të veprës penale të vrasjes. Parashtruesit pohuan se gjykatat e rregullta të të gjitha shkallëve kanë cenuar të drejtat dhe liritë e tyre të garantuara me nenin 30, 31, 33 të Kushtetutës së Kosovës dhe nenit 5 (1), nenit 6 (1) (2) dhe nenit 14 të Konventës Evropiane për të Drejtat e Njeriut, Gjykata konstatoi se kërkesa e parashtruesve ishte e papranueshme bazuar në Rregullin 36 të Rregullores së Punës për shkak se ishte qartazi e pabazuar. Gjykata vendimin e saj e arsyetoi duke theksuar se gjykatat e rregullta i kanë marrë parasysh dhe iu kanë përgjigjur ankesave të parashtruesve në çështje ligjore që kanë të bëjnë me pranimin e provave dhe vërtetësinë e tyre, vërtetimin e gjendjes faktike dhe zhvillimin e procedurës penale. Gjykata poashtu përsëriti se nuk është gjykatë e apelit apo gjykatë e shkallës së katërt dhe se vërtetimi i plotë dhe i drejtë i gjendjes faktike është juridiksion i gjykatave të rregullta. Duke cituar vendimin e GJEDNJ-së në rastin Mezotur-Tiszazugi Tarsulat kundër Hungarisë, Gjykata më tutje arsyetoi se fakti që parashtruesit janë të pakënaqur me rezultatin e rastit nuk mund të ngrejë kërkesë të argumentueshme për shkelje të të drejtave dhe lirive kushtetuese. Për shkak të arsyeve të përmendura, Gjykata vendosi të hedhë poshtë kërkesën e parashtruesit si të papranueshme.

Parashtruesit:

Burim Ramadani dhe Arsim Ramadani

Lloji i kërkesës:

KI - Kërkesë individuale

Lloji i aktit:

Aktvendim për papranueshmëri

Kërkesa është qartazi e pabazuar

Lloji i procedurës së ndjekur para institucioneve tjera :

Penale