Gjykata Kushtetuese

KI63/20, Parashtrues: Ilir Zymberi, vlerësim i kushtetutshmërisë së Aktgjykimit të Gjykatës së Apelit Ac. nr. 4336/19 të 6 shkurtit 2020

KI63/20, aktvendim për papranueshmëri i 12 prillit 2021, publikuar më 1 qershor 2021

Fjalët kyç: kërkesë individuale, vlerësim i kushtetutshmërisë së aktgjykimit të kontestuar të Gjykatës së Apelit, qartazi i pabazuar

Korporata Energjetike e Kosovës (në tekstin e mëtejmë: KEK) kundër parashtruesit të kërkesës parashtroi propozim për ekzekutim për shkak të borxheve të papaguara për energji elektrike të konsumuar.
Parashtruesi i kërkesës parashtroi kundërshtim ndaj urdhrit për përmbarim në Gjykatën Themelore në Gjakovë, duke deklaruar se borxhi i kontestuar ishte parashkruar.
Ky kundërshtim u shqyrtua nga gjykatat e rregullta duke përfunduar me Gjykatën e Apelit, të cilat konstatuan që parashtruesi i kërkesës nuk kishte respektuar kontratën për pagesën e borxhit në bazë të së cilës borxhi nuk ishte parashkruar.

Parashtruesi i kërkesës pretendoi se gjykatat e rregullta kanë shkelur të drejtat e tij të garantuara me Kushtetutë nga neni 31 [E Drejta për Gjykim të Drejtë dhe të Paanshëm] të Kushtetutës në lidhje me nenin 6 (E drejta për një proces të rregullt) të KEDNJ-së.
Gjykata konstatoi se argumentet e ngritura në kërkesën e parashtruesit të kërkesës në asnjë mënyrë nuk justifikojnë shkeljet e pretenduara të të drejtave kushtetuese në të cilat thirret parashtruesi i kërkesës dhe ai nuk i ka mbështetur pretendimet për shkeljen e të drejtave të mbrojtura me Kushtetutë dhe Konventë, prandaj, Gjykata arriti në përfundimin se pretendimet e parashtruesit të kërkesës për shkeljen e të drejtave të garantuara me nenin 31 të Kushtetutës, këto pretendime të parashtruesit cilësohen si pretendime që hyjnë në kategorinë (i) e pretendimeve të “shkallës së katërt”. Prandaj, këto të fundit janë qartazi të pabazuara në baza kushtetuese, siç përcaktohet në paragrafin (2) të rregullit 39 të Rregullores së punës.