Gjykata Kushtetuese

KI92/20, Parashtrues: Milomirka Tamburić, vlerësim i kushtetutshmërisë së aktit të paspecifikuar të autoritetit publik

KI92/20 Vendim për Refuzimin e Kërkesës i 25 mars 2021, publikuar më 7 prill 2021

Fjalët kyç: kërkesë individuale, mbrojtja e pronës, kërkesë e paplotë dhe e paqartë, refuzim me procedure te shkurtër

Parashtruesja e  kërkesës në Gjykatën Kushtetuese, kontestoi një akt të paspecifikuar të autoritetit publike, duke pretenduar se asaj dhe përfaqësuesit të saj i janë shkelur  të drejtat nga disa individë dhe autoritete publike të Republikës së Kosovës. Nga thelbi i ankesave Gjykata vërejti se kërkesa bënte fjalë për të drejta pronësore, të cilat garantohen me nenin 46 të Kushtetutës.

Gjykata në rrethanat e këtij rasti vërejti se kërkesa e parashtrueses së kërkesës ishte e paqartë dhe e paplotë, andaj më 26 qershor 2020 kishte kërkuar nga parashtruesja e kërkesës ta plotësonte formularin e kërkesës dhe ta qartësonte atë, duke ia bashkëngjitur dokumentacionin mbështetës relevant. Më 21 korrik 2020, përfaqësuesi i parashtrueses së kërkesës në Gjykatë kishte dorëzuar një shkresë, e cila shprehte ankesat e përsëritura ndaj disa individëve dhe autoriteteve publike të caktuara. Megjithatë edhe përkundër kërkesës së Gjykatës, që në afatin prej 15 (pesëmbëdhjetë) ditësh, nga pranimi i shkresës, të plotësohej dhe qartësohej kërkesa, dhe t’i bashkëngjiteshin informatat dhe dokumentacioni relevant, një gjë e tillë nuk është bërë.

Gjykata në këtë rast ia rikujtoi parashtrueses së kërkesës se barra për të ndërtuar, sqaruar dhe plotësuar kërkesën bie mbi parashtruesit e kërkesës, të cilët kanë interes të drejtpërdrejtë në mënyrë që pohimet dhe pretendimet e tyre të adresohen në mënyrë sa më efektive nga Gjykata. Në rastet kur parashtruesit e kërkesës nuk i përgjigjen kërkesës së Gjykatës për qartësimin dhe plotësimin e kërkesës, Gjykata, të njëjtat i deklaron si të paqarta dhe të paplota, dhe si rezultat nuk i shqyrton pretendimet e parashtruesit të kërkesës. (Shih, rastet e Gjykatës, KI89/18, parashtrues: Agim Jashari, Vendim për refuzimin e kërkesës, i 27 nëntorit 2018, paragrafi 29; KI74/18, parashtrues: Gëzim Murati, Vendimi për refuzimin e kërkesës, i 3 dhjetorit 2018, paragrafi 26; KI78/20, KI79/20 dhe KI80/20, parashtrues: Hilmi Aliu dhe të tjerët, Vendim për refuzim të kërkesës, i 11 nëntorit 2020, paragrafi 33; dhe KI90/20, parashtrues: Arben Boletini, Vendim për refuzim të kërkesës, i 25 nëntorit 2020, paragrafi 25).

Si përmbledhje, Gjykata përfundoi se kërkesa e parashtrueses së kërkesës nuk i përmbush kriteret formale për shqyrtim të mëtejmë, për shkak se është e paplotë dhe e paqartë. Andaj, Gjykata, në pajtim me nenin 22.4 dhe 48 të Ligjit, me rregullin 32 (2) (h) dhe me rregullin 35 (5) të Rregullores së punës, kërkesa duhet të refuzuar me procedurë të shkurtër.