Constitutional Court

KI118/20, Parashtrues: Selim Leka, vlerësim i kushtetutshmërisë së Aktvendimit të Gjykatës Supreme, Rev.179/19, të 14 janarit 2020

KI118/20, Aktvendim për papranueshmëri i 21 tetorit 2021, publikuar më 9 nëntor 2021

Fjalët kyç: kërkesë individuale, kontrata kolektive, paga jubilare, regresi, kërkesë e paafatshme

Nga shkresat e lëndës rezulton se parashtruesi i kërkesës ishte pensionuar më 3 shkurt 2014 për shkak të arritjes së moshës 65 vjeçare të pensionimit. Ai kishte punuar mësimdhënës në shkollën fillore të mesme të ulët në Zabel, komuna e Gjilanit. Parashtruesi i kërkesës kishte paraqitur padi kundër të paditurës Komuna e Gjilanit-Drejtoria Komunale e Arsimit në Gjilan, duke kërkuar të detyrohet e paditura që t’ia kompensojë pagesën e një page mujore për shpërblim jubilar dhe pagesën e një page mujore për përcjellje në pension dhe regresin. Gjykata Themelore në Gjilan me Aktgjykim [C.nr.378/18] e refuzoi të pabazuar kërkesëpadinë e parashtruesit të kërkesës.  Gjykata e Apelit me Aktvendim [AC.nr.5550/18] vendosi që të hedhet poshtë padia e parashtruesit të kërkesës. Gjykata Supreme me Aktvendim [Rev. 179/19] e hodhi të palejuar revizionin e parashtruesit të kërkesës të paraqitur kundër vendimeve të gjykatave të instancës më të ulët. Gjykata Supreme konstatoi se bazuar në nenin 211.2 të LPK-së revizioni është i palejuar për shkak se vlera e objektit të kontestit nuk i kalon 3.000€.

Në procedurë para Gjykatës Kushtetuese, parashtruesi i kërkesës, kërkoi që (i) të aprovohet në tërësi kërkesëpadia për pagat pas pensionimit kundër palës së paditur Drejtoria Komunale e Arsimit në Gjilan dhe (ii) ose lënda të kthehet në rivendosje.

Në vlerësimin e pretendimeve të parashtruesit të kërkesës, Gjykata rikujtoi se afati katër (4) mujor fillon nga “vendimi i fundit” në procesin e shterjes së mjeteve juridike me të cilin është refuzuar kërkesa e parashtruesit të kërkesës. Gjykata vlerësoi se “vendim i fundit” bazuar në nenin 49 të Ligjit është Aktvendimi i Gjykatës së Apelit [Ac.nr.5550/18] i 20 shkurtit 2019, me të cilin ishte hedhur poshtë ankesa e parashtruesit të kërkesës dhe i cili ishte i formës së prerë dhe i paapelueshëm.

Gjykata konkludoi se kërkesa e parashtruesit të kërkesës në lidhje me Aktvendimin Gjykatës së Apelit [Ac.nr.5550/18] të 20 shkurtit 2019 është dorëzuar pas afatit ligjor katër (4) mujor të parashikuar me nenin 49 të Ligjit dhe specifikuar më tej me Rregullin 39 (1) (c) të Rregullores së punës.