Gjykata Kushtetuese

KI117/20, Parashtrues: Isuf Musliu, Vlerësim i kushtetutshmërisë së mungesës së vendimeve gjyqësore lidhur me kërkesën për kompensim material dhe kthim në punë në Universitetin e Prishtinës

KI117/20, Aktvendim për papranueshmëri, i 11 nëntorit 2020, publikuar më 29 dhjetor 2020

Fjalët kyç: Kërkesë individuale, padi kompensimi, mos shterim i mjeteve juridike

Parashtruesi i kërkesës konteston para Gjykatës Kushtetuese mungesën e vendimeve gjyqësore lidhur me kërkesën për kompensim material për ligjëratat e mbajtura dhe kthim në punë si profesor në Universitetin e Prishtinës. Parashtruesi i kërkesës nuk kishte qartësuar saktësisht se cilat të drejta dhe liri themelore të garantuara me Kushtetutë pretendon se i janë cenuar.

Gjykata vërejti se parashtruesi i kërkesës i ishte drejtuar Gjykatës Themelore me padi kundër Rektoratit të Universitetit të Prishtinës duke kërkuar kompensimin e të ardhurave dhe honorarëve për ligjëratat që parashtruesi pretendon se i ka mbajtur në Universitetin e Prishtinës dhe atë të Prizrenit, si dhe kthimin në vendin e punës si ligjërues në Universitetin e Prishtinës.

Më 15 korrik 2019, Gjykata Themelore kishte mbajtur seancën përgatitore, lidhur me padinë e parashtruesit të kërkesës në të cilën ishte aprovuar kërkesa e parashtruesit të kërkesës që të kërkohen informata nga Fakulteti i Edukimit në Prizren për ligjëratat e mbajtura nga parashtruesi i kërkesës. Për më tepër Gjykata Themelore në përgjigjen e saj drejtuar Gjykatës theksoi se lënda e parashtruesit të kërkesës “është me prioritet ligjor dhe e njëjta do të procedohet brenda kohës së arsyeshme, sipas radhës së lëndëve me prioritet të njëjtë“.

Në këtë kontekst, rezulton se lidhur me padinë e parashtruesit të kërkesës është duke u zhvilluar procedura gjyqësore para Gjykatës Themelore e cila ende nuk ka nxjerr vendim lidhur me padinë e parashtruesit të kërkesës. Në këtë drejtim, Gjykata vë theksin në faktin se të gjitha pretendimet e parashtruesit të kërkesës mund të shqyrtohen nga gjykatat e rregullta. Si rrjedhojë, Gjykata konstaton se parashtruesi i kërkesës e ka paraqitur kërkesën e tij në Gjykatën Kushtetuese para se të shterojë të gjitha mjetet efektive të parapara në legjislacionin përkatës. Andaj, kërkesa e parashtruesit para Gjykatës Kushtetuese është e parakohshme dhe duhet të deklarohet e papranueshme, në baza kushtetuese, siç përcaktohet me nenin 113.7 të Kushtetutës, parashihet me nenin 47 të Ligjit dhe specifikohet më tej me rregullin 39 (1) (b) të Rregullores së punës.