Gjykata Kushtetuese

Prishtinë, më 12 gusht 2024​​ 

 Nr. ref.: RK 2510/24

VENDIM PËR REFUZIM TË KËRKESËS​​ 

në

rastin nr. KI99/24

Parashtrues

Ismet Arifaj

Vlerësim i kushtetutshmërisë

së​​ aktit të paspecifikuar të autoritetit publik

GJYKATA KUSHTETUESE E REPUBLIKËS SË KOSOVËS

e përbërë nga:

Gresa Caka-Nimani, kryetare

Bajram Ljatifi, zëvendëskryetar

Selvete Gërxhaliu-Krasniqi, gjyqtare

Safet Hoxha, gjyqtar

Radomir Laban, gjyqtar

Remzije Istrefi-Peci, gjyqtare

Nexhmi Rexhepi, gjyqtar

Enver Peci, gjyqtar dhe​​ 

Jeton Bytyqi, gjyqtar

Parashtruesi i kërkesës

• Kërkesa është dorëzuar nga​​ Ismet Arifaj​​ nga​​ fshati​​ Shtupel,​​ Komuna e​​ Klinës​​ (në tekstin e mëtejmë: parashtruesi i kërkesës).

Vendimi i kontestuar

• Parashtruesi i kërkesës​​ nuk specifikon se cilin akt konkret të autoritetit publik e konteston në procedurë në Gjykatën Kushtetuese të Republikës së Kosovës (në tekstin e mëtejmë: Gjykata).​​ ​​ 

Objekti i çështjes​​ 

• Parashtruesi i kërkesës nuk saktëson cilat të drejta dhe liri themelore të​​ garantuara me​​ Kushtetutën e Republikës së Kosovës (në tekstin e mëtejmë: Kushtetuta) janë cenuar.​​ ​​ 

Baza juridike​​ 

• Kërkesa bazohet në paragrafët 1 dhe 7 të nenit 113 [Juridiksioni dhe Palët e Autorizuara] të Kushtetutës, në nenet 22 (Procedimi i kërkesës) dhe 47 (Kërkesa individuale) të Ligjit nr. 03/L-121 për Gjykatën Kushtetuese të Republikës së Kosovës (në tekstin e mëtejmë: Ligji) dhe në rregullin​​ 25​​ (Parashtrimi i kërkesave dhe përgjigjeve) të Rregullores së punës së Gjykatës Kushtetuese të Republikës së Kosovës (në tekstin e mëtejmë: Rregullorja e punës).​​ 

Procedura në Gjykatën Kushtetuese

• Më​​ 8​​ prill 2024, parashtruesi i kërkesës​​ përmes postës elektronike​​ e dorëzoi kërkesën në Gjykatën Kushtetuese të Republikës së Kosovës (në tekstin e mëtejmë: Gjykata).

• Më 23 prill 2024, Gjykata e njoftoi parashtruesin e kërkesës për regjistrimin e kërkesës dhe kërkoi nga ai që të plotësojë kërkesën me dokumentet dhe informatat si në vijim:​​ (i) cilin vendim të autoritetit publik e kontestoni para Gjykatës; (ii) specifikoni cilat të drejta dhe liri kushtetuese pretendoni se u janë cenuar; (iii) bashkëngjitni vendimin e fundit të kontestuar së bashku me vendimet tjera apo dokumentet e nevojshme që kanë të bëjnë m e këtë kërkesë; dhe (iv) dorëzoni dhe plotësoni formularin e kërkesës për procedurë në Gjykatë së bashku​​ me dokumentacionin përcjellës.

• Më 24 prill 2024, parashtruesi i kërkesës dorëzoi në Gjykatë një urdhër përmbarimor dhe një konkluzion të Gjykatës Themelore në Pejë por pa specifikuar se cilat të drejta​​ dhe liri​​ themelore i janë cenuar dhe nëse i janë cenuar​​ në lidhje me​​ dokumentet e bashkëngjitura, për më tepër, nuk dorëzoi as formularin e kërkesës për procedurë në Gjykatë së bashku me dokumentacionin përcjellës, siç i ishte kërkuar me shkresën e 23 prillit 2024.​​ 

• Më​​ 25 prill 2024, Kryetarja e Gjykatës​​ përmes Vendimit [Nr. GJR. KI99/24]​​ caktoi gjyqtarin​​ Radomir Laban​​ gjyqtar​​ raportues, ndërkaq përmes Vendimit​​ [Nr. KSH. KI99/24]​​ caktoi​​ Kolegjin shqyrtues, të përbërë nga gjyqtarët:​​ Gresa Caka-Nimani​​ (kryesuese),​​ Bajram Ljatifi​​ dhe​​ Jeton Bytyqi​​ (anëtarë).

• Më​​ ​​ 17 korrik​​ 2024,​​ Kolegji shqyrtues shqyrtoi raportin e gjyqtarit​​ raportues dhe njëzëri​​ ​​ i rekomandoi Gjykatës që ta refuzojë kërkesën me procedurë të shkurtër.

Përmbledhja e fakteve

• Parashtruesi​​ i kërkesës​​ në​​ Gjykatë​​ dorëzoi: (i) Urdhrin Përmbarimor [P.nr.1048/2018] të datës 21 tetor 2021 të nxjerrë nga përmbaruesi privat B.B., kundër parashtruesit të​​ kërkesës për mbylljen borxhit prej 640.07 euro në dobi të kreditorit Kompania Kosovare për Furnizim me Energji Elektrike Sh.a. (KESco); dhe (ii) Konkluzion [Cpp.nr.14/20] të 10 marsit 2021 të Gjykatës Themelore në Pejë, përmes të cilit ishte refuzuar e pabazuar kërkesa e parashtruesit të kërkesës për lirim nga pagesa e gradacionit për ankesë. ​​ ​​ ​​ 

Pretendimet e parashtruesit të kërkesës

• Parashtruesi i kërkesës​​ vetëm sa ka dorëzuar urdhrin dhe konkluzion e lartpërmendur por nuk ka artikuluar asnjë ankesë apo pretendimin lidhur me dokumentet në fjalë.​​ 

Vlerësimi i​​ pranueshmërisë së kërkesës

• Gjykata​​ së pari​​ shqyrton​​ nëse​​ janë​​ përmbushur kriteret e pranueshmërisë,​​ të​​ përcaktuara me​​ Kushtetutë dhe të specifikuara më tej me​​ Ligj dhe​​ Rregullore të​​ punës.​​ 

• Në këtë drejtim, Gjykata i referohet paragrafëve 1 dhe 7 të nenit 113 [Jurisdiksioni dhe Palët e Autorizuara] të Kushtetutës, të cilët përcaktojnë:

“1.Gjykata Kushtetuese vendos vetëm për rastet e ngritura para gjykatës në  ​​ ​​ ​​ ​​ ​​ ​​ ​​​​ mënyrë ligjore nga pala e autorizuar.

[...]

7. Individët janë të autorizuar të ngrenë shkeljet nga autoritetet publike të të drejtave dhe lirive të tyre individuale, të garantuara me Kushtetutë, mirëpo vetëm pasi të kenë shteruar të gjitha mjetet juridike të përcaktuara me ligj.”

• Gjykata po ashtu iu referohet neneve 47 (Kërkesa individuale) dhe 48 (Saktësimi i kërkesës) të Ligjit, të cilët përcaktojnë:​​ 

Neni 47​​ 

(Kërkesa individuale)

“1. Çdo individ ka të drejtë të kërkojë nga Gjykata Kushtetuese mbrojtje juridike në rast se​​ pretendon se të drejtat dhe liritë e tija individuale të garantuara​​ me Kushtetutë janë shkelur nga​​ ndonjë autoritet publik.​​ 

2. Individi mund ta ngritë kërkesën në fjalë vetëm pasi që të ketë shteruar të gjitha mjetet juridike​​ të përcaktuara me ligj.”

Neni 48

(Saktësimi i kërkesës)

“Parashtruesi i kërkesës ka për detyrë që në kërkesën e tij të qartësoj saktësisht se cilat të drejta dhe liri pretendon se i janë cenuar dhe cili është akti konkret i autoritetit publik të cilin parashtruesi dëshiron ta kontestoj.”

• Në kontekst të dispozitave të lartcekura, Gjykata thekson se bazuar në paragrafin 7 të nenit 113 të Kushtetutës, paragrafin 1 të nenit 47 dhe nenit 48 të Ligjit, parashtruesit e kërkesave duhet të specifikojnë aktin konkret të autoritetit publik që kontestohet dhe​​ gjithashtu janë të detyruar që të qartësojnë se cilat të drejta dhe liri pretendojnë se u janë​​ cenuar.

• Në​​ rastet kur kërkesa nuk i përmbush kriteret kushtetuese dhe ligjore të​​ pranueshmërisë, Ligji dhe Rregullorja e punës përcaktojnë procedurën që​​ duhet ndjekur nga Gjykata në​​ mënyrë që​​ parashtruesit të​​ kërkesës​​ t’i jepet mundësi për të​​ kompletuar dhe plotësuar kërkesën e tij.​​ 

• Në​​ lidhje me​​ këtë, Gjykata,​​ përmes​​ shkresës​​ së​​ 23 prillit​​ 2024, kishte​​ kërkuar​​ nga parashtruesi i​​ kërkesës​​ që​​ të​​ njoftojë​​ Gjykatën​​ se​​ (i) cilin vendim të autoritetit publik e kontestoni para Gjykatës; (ii) specifikoni cilat të drejta dhe liri kushtetuese pretendoni se u janë cenuar; (iii) bashkëngjitni vendimin e fundit të kontestuar së bashku me vendimet tjera apo dokumentet​​ e nevojshme që kanë të bëjnë me këtë kërkesë; dhe (iv) dorëzoni dhe plotësoni formularin e kërkesës për procedurë në Gjykatë së bashku​​ me dokumentacionin përcjellës.

• Në vijim të kërkesës së Gjykatës, parashtruesi i kërkesës, më 24 prill 2024, dorëzoi Urdhrin Përmbarimor [P.nr.1048/2018] të datës 21 tetor 2021 të nxjerrë nga përmbaruesi privat B.B., kundër parashtruesit të kërkesës për mbylljen borxhit prej 640.07 euro në dobi të kreditorit Kompania Kosovare për Furnizim me Energji Elektrike Sh.a. (KESco); dhe (ii) Konkluzion [Cpp.nr.14/20] të 10 marsit 2021 të Gjykatës Themelore në Pejë, përmes të cilit ishte refuzuar e pabazuar kërkesa e parashtruesit të kërkesës për lirim nga pagesa e gradacionit për ankesë.​​ Megjithatë,​​ parashtruesi i kërkesës vetëm sa ka dorëzuar​​ dokumentet e lartpërmendura​​ por​​ pa​​ artikuluar asnjë ankesë apo pretendimin lidhur me​​ to.​​ 

​​ 

• Bazuar në si më sipër, Gjykata duke u mbështetur në Rregulloren e punës, mund ta refuzojë kërkesën me procedurë të shkurtër.​​ 

• Në këtë drejtim, Gjykata i referohet pikës (a) paragrafi 2 të rregullit 54 (Hedhja poshtë dhe refuzimi i kërkesës)​​ të Rregullores së punës, i cili specifikon:

“[...]

(2) Gjykata mund të​​ vendosë​​ ta refuzojë​​ një​​ kërkesë​​ me procedurë​​ të​​ shkurtër​​ në​​ 

qofte se:​​ 

(a)​​ kërkesa​​ është​​ jo e plotë​​ ose e paqartë,​​ përkundër​​ kërkesës​​ ose​​ kërkesave​​ 

nga Gjykata ndaj​​ palës​​ që​​ ta​​ plotësojë​​ ose të​​ qartësojë​​ kërkesën;

[...]”

• Gjykata rikujton se parashtruesi i kërkesës​​ në përgjigjen e 24 prillit 2024​​ ka dorëzuar Urdhrin Përmbarimor [P.nr.1048/2018] të datës 21 tetor 2021 dhe Konkluzion [Cpp.nr.14/20] të 10 marsit 2021 të Gjykatës Themelore në Pejë, mirëpo në procedurë para Gjykatës nuk ka specifikuar e as saktësuar se cilat të drejta dhe liri themelore i janë cenuar, siç përcaktohet me nenin 48 të Ligjit.​​ 

• Në këtë kontekst,​​ për​​ Gjykatën​​ është objektivisht e pamundur për të dhënë vlerësim kushtetues​​ kundrejt kërkesës së parashtruesit të kërkesës.

• Gjykata përsëritë​​ se barra për te ndërtuar, sqaruar dhe plotësuar kërkesën bie mbi parashtruesit e kërkesës, te cilët kanë​​ interes të​​ drejtpërdrejtë​​ në​​ mënyrë që​​ pohimet​​ dhe pretendimet e tyre të​​ adresohen në​​ mënyrë efektive nga Gjykata. Në​​ rastet​​ kur parashtruesit e kërkesave​​ nuk i përgjigjen kërkesës së​​ Gjykatës për qartësimin dhe plotësimin e kërkesës, Gjykata i deklaron këto kërkesa si të​​ paqarta dhe jo të​​ plota, dhe si rezultat nuk i shqyrton pretendimet e parashtruesit të​​ kërkesës (shih, rastet e Gjykatës,​​ KI13/23, parashtruese​​ Marigona Ðorđević-Jakaj, Vendim për refuzim të​​ kërkesës i 29 gushtit 2023, paragrafi 22;​​ KI08/22, parashtrues​​ Bajram Santuri, Vendim​​ për​​ refuzim të​​ kërkesës, i 6 korrikut 2022, paragrafi 38; dhe​​ KI101/21, parashtrues​​ “N.T.SH. Morina B”, Vendim​​ për​​ refuzim të​​ kërkesës, i 8 shtatorit 2021, paragrafi 36).

• Si përfundim, Gjykata, në​​ bazë​​ të​​ nenit 48 të​​ Ligjit dhe pikës​​ (a) të​​ paragrafit 2 të​​ rregullit 54 (Hedhja poshtë dhe refuzimi i kërkesës) të​​ Rregullores​​ ​​ së​​ punës konstaton se kërkesa është e paplotë​​ dhe e paqartë dhe duhet të​​ refuzohet me procedurë​​ të​​ shkurtër.​​ ​​ ​​ 

PËR KËTO ARSYE

Gjykata Kushtetuese, në pajtim me nenin 113​​ (1) dhe (7)​​ të Kushtetutës,​​ nenin​​ 48 të Ligjit dhe​​ rregullin 54 (2) (a)​​ të​​ Rregullores së punës, më​​ ​​ 17 korrik​​ ​​ 2024, njëzëri

VENDOS

• TË REFUZOJË kërkesën​​ me procedurë të shkurtër;

• T'UA KUMTOJË këtë​​ vendim palëve;

• TË PUBLIKOJË këtë​​ vendim në Gazetën Zyrtare, në pajtim me nenin 20.4 të Ligjit;

• Ky​​ vendim hyn në fuqi​​ në ditën e shpalljes në Gazetën Zyrtare​​ të Republikës së Kosovës, në pajtim me paragrafin 5 të nenit 20 të Ligjit.​​ 

Gjyqtar raportues   ​​ ​​ ​​ ​​ ​​ ​​ ​​ ​​ ​​ ​​​​  ​​ ​​ ​​ ​​ ​​ ​​ ​​ ​​​​   Kryetarja e Gjykatës Kushtetuese

Radomir Laban     ​​ ​​ ​​ ​​ ​​ ​​​​  Gresa Caka-Nimani