Gjykata Kushtetuese

Prishtinë, më​​ 28​​ qershor 2024

Nr. ref.: RK 2455/24

VENDIM PËR REFUZIM TË KËRKESËS

në

rastin nr.​​ KI182/23

Parashtrues

Bajram Santuri

Vlerësim i​​ kushtetutshmërisë​​ 

së​​ aktit të paspecifikuar

GJYKATA KUSHTETUESE E REPUBLIKËS SË​​ KOSOVËS

e përbërë nga:

Gresa Caka-Nimani, kryetare

Bajram Ljatifi, zëvendëskryetar,

Selvete Gërxhaliu-Krasniqi, gjyqtare

Safet Hoxha, gjyqtar

Radomir Laban, gjyqtar

Remzije Istrefi-Peci, gjyqtare

Nexhmi Rexhepi, gjyqtar

Enver Peci, gjyqtar dhe​​ 

Jeton Bytyqi, gjyqtar

Parashtruesi i kërkesës​​ 

• Kërkesa është parashtruar nga Bajram Santuri, nga Prizreni (në tekstin e mëtejmë: parashtruesi i kërkesës).

Vendimi i kontestuar​​ 

• Parashtruesi i kërkesës​​ nuk specifikon se cilin vendim të​​ autoritetit publik e konteston.

Objekti i çështjes​​ 

• Parashtruesi​​ në​​ kërkesën e tij​​ nuk​​ saktëson​​ se cilat të​​ drejta të​​ garantuara​​ me​​ Kushtetutën e​​ Republikës së Kosovës (në tekstin e mëtejmë: Kushtetuta) i​​ janë​​ shkelur.​​ 

Baza juridike​​ 

• Kërkesa bazohet në paragrafët 1 dhe 7 të nenit 113 [Juridiksioni dhe Palët e Autorizuara] të Kushtetutës,​​ në nenet 22 [Procedimi i kërkesës] dhe 47 [Kërkesa individuale] të Ligjit për Gjykatën Kushtetuese të Republikës së Kosovës, nr. 03/L-121 (në tekstin e mëtejmë: Ligji), si dhe në rregullin 25​​ [Parashtrimi i kërkesave dhe përgjigjeve] të Rregullores së punës së Gjykatës Kushtetuese të Republikës së Kosovës (në tekstin e mëtejmë: Rregullorja e punës).

Procedura në Gjykatën Kushtetuese

• Më​​ 22 gusht 2023, parashtruesi i kërkesës​​ e dorëzoi kërkesën e tij​​ në Gjykatën​​ Kushtetuese​​ të​​ Republikës së Kosovës (në tekstin e mëtejmë: Gjykata).

• Më 15 shtator 2023, Gjykata e njoftoi parashtruesin e kërkesës për regjistrimin e kërkesës dhe​​ i kërkoi të: (i) plotësonte formularin e kërkesës; (ii) të​​ specifikonte se cilin vendim të​​ autoritetit publik e konteston; (iii) të​​ saktësonte cilat të​​ drejta dhe liri kushtetuese​​ pretendon​​ se i janë​​ shkelur.

• Më 18 shtator 2023, Kryetarja e Gjykatës përmes Vendimit [GJR. KI182/23] caktoi gjyqtarin​​ Enver Peci​​ gjyqtar​​ raportues dhe Kolegjin shqyrtues, të përbërë nga gjyqtarët: Gresa Caka-Nimani (kryesuese), Bajram Ljatifi dhe​​ Radomir Laban​​ (anëtarë).

• Më​​ 21 shtator 2023, parashtruesi i kërkesës dërgoi një​​ kërkesë​​ në​​ Gjykatë, nëpërmjet së​​ cilës kërkonte sqarime se për cilin rast të​​ tij bëhej fjalë, dhe gjithashtu kërkonte një​​ afat shtesë​​ për plotësimin dhe sqarimin e kërkesës.

• Më​​ 29 shtator, 16 tetor, 15 nëntor dhe 23 nëntor​​ 2023, parashtruesi i kërkesës dorëzoi në​​ Gjykatë​​ dokumente shtesë.

• Më 11 mars 2024, gjyqtari Jeton Bytyqi dha betimin para Presidentes së Republikës së Kosovës, me ç’ rast filloi mandati i tij në Gjykatë.

• Më​​ 30 prill 2024, Kolegji shqyrtues shqyrtoi raportin e​​ gjyqtarit​​ raportues dhe njëzëri i rekomandoi Gjykatës​​ që të refuzojë kërkesën me procedurë të shkurtër.​​ 

Përmbledhja e fakteve​​ 

• Gjykata​​ thekson se parashtruesi i kërkesës ka parashtruar kërkesa në​​ Gjykatë​​ edhe katër herë​​ të​​ tjera në​​ të​​ kaluarën.​​ 

• Në​​ rastin e parë​​ KI63/09, kërkesën e kishte dorëzuar më​​ 15 dhjetor 2009. Gjykata nëpërmjet aktvendimit për papranueshmëri​​ të​​ 6 korrikut​​ 2011, shpalli kërkesën të​​ papranueshme “ratione temporis”​​ dhe “ratione personae” me Kushtetutën.

​​ 

• Në​​ rastin e dytë​​ KI65/14, kërkesën e kishte dorëzuar më​​ 1 prill 2014. Gjykata nëpërmjet aktvendimit​​ për papranueshmëri të​​ 1 korrikut​​ 2014, shpalli kërkesën e papranueshme, një​​ pjesë​​ për shkak të​​ mosshterjes së​​ mjeteve juridike dhe​​ një​​ pjesë​​ për shkak se ishte paraqitur jashtë​​ afatit kohor.​​ 

• Në​​ rastin e tretë​​ KI134/18, kërkesën e kishte dorëzuar më​​ 28 gusht 2018. Gjykata nëpërmjet Vendimit​​ për refuzim të​​ 16 janarit 2019,​​ refuzoi kërkesën sepse ishte përsëritje e dy kërkesave të​​ para.

​​ 

• Në​​ rastin e katërt KI08/22,​​ kërkesën e kishte dorëzuar më​​ 24 janar 2022.​​ Gjykata nëpërmjet Vendimit për refuzim të​​ 6 korrikut 2022,​​ refuzoi kërkesën sepse ishte e paplotë​​ dhe jo e qartë.

• Kjo​​ është​​ kërkesa e pestë​​ që​​ parashtruesi i kërkesës e parashtron në​​ Gjykatë, e regjistruar me nr. KI182/23.

Pretendimet e parashtruesit​​ të kërkesës

• Gjykata thekson se parashtruesi i kërkesës nuk përmend asnjë​​ pretendim në​​ lidhje me shkeljet eventuale kushtetuese të​​ të​​ drejtave dhe lirive themelore të​​ garantuara nga Kushtetuta.

• Parashtruesi i kërkesës në​​ formularin e kërkesës përshkruan në​​ mënyrë​​ të paqartë​​ shumë​​ pretendime për kryerje të​​ veprave penale dhe shkelje të​​ dispozitave ligjore.​​ 

• Parashtruesi i kërkesës i përsërit përshkrimet nga rastet e kaluara në​​ Gjykatë.

Pranueshmëria e kërkesës

• Gjykata së pari vlerëson nëse parashtruesi i kërkesës i ka përmbushur kriteret e pranueshmërisë, të përcaktuara në Kushtetutë dhe të parashikuara më tej në Ligj dhe në Rregullore të punës.​​ 

• Në këtë drejtim, Gjykata i referohet paragrafëve 1 dhe 7 të nenit 113 [Juridiksioni dhe Palët e Autorizuara] të Kushtetutës, në lidhje me nenet 46, 47, 48 të Ligjit, dhe rregullave 54 dhe 74 të Rregullores ​​ së punës.

Neni 113

[Juridiksioni dhe Palët e Autorizuara]

“1. Gjykata Kushtetuese vendos vetëm për rastet e ngritura para gjykatës në mënyrë ligjore nga pala e autorizuar.

[...]

Neni 46​​ 

[Lejueshmëria]​​ 

Gjykata Kushtetuese pranon dhe procedon kërkesën e ngritur sipas nenit 113, paragrafi 7 të Kushtetutës, nëse konstaton se janë plotësuar të gjitha kushtet e përcaktuara ligjore.

Neni 47

[Kërkesa individuale]

“1. Çdo individ ka të drejtë të kërkojë nga Gjykata Kushtetuese mbrojtje juridike në rast se pretendon se të drejtat dhe liritë e tija individuale të garantuara me Kushtetutë janë shkelur nga ndonjë autoritet publik.

Neni 48

[Saktësimi i kërkesës]

“Parashtruesi i kërkesës ka për detyrë që në kërkesën e tij të qartësoj saktësisht se cilat të drejta dhe liri pretendon se i janë cenuar dhe cili është akti konkret i autoritetit publik të cilin parashtruesi dëshiron ta kontestoj”.

Rregulli 54​​ 

[Hedhja poshtë dhe refuzimi i kërkesës]

(2) Gjykata mund të vendosë​​ ta refuzojë​​ një​​ kërkesë​​ me procedurë​​ të​​ shkurtër në​​ qoftë​​ se:​​ 

(a) kërkesa​​ është​​ jo e plotë​​ ose e paqartë, përkundër kërkesës ose kërkesave nga Gjykata ndaj palës që​​ ta plotësojë​​ ose ta qartësojë​​ kërkesën;

[...]

Rregulli 74​​ 

[Kërkesa në pajtim me paragrafin 7 të nenit 113 të Kushtetutës dhe me nenet 4 6,​​ 47,​​ 48,​​ 49 dhe 50 të Ligjit]

(1) Kërkesa e ngritur sipas këtij rregulli duhet të përmbushë kriteret e përcaktuara me paragrafin (7) të nenit 113 të Kushtetutës dhe me nenet 46 (Lejueshmëria), 47 (Kërkesa individuale), 48 (Saktësimi i kërkesës), 49 (Afatet) dhe 50 (Kthimi në​​ gjendjen e mëparshme) të​​ Ligjit.

(2) Kërkesa e parashtruar sipas këtij rregulli duhet të​​ qartësojë saktësisht se cilat të​​ drejta dhe liri pretendohet se janë shkelur dhe se cili është akti konkret i autoritetit publik i cili kontestohet.

• Gjykata​​ thekson se bazuar në​​ praktikën e GJEDNJ-së, një​​ kërkesë​​ kushtetuese duhet t’i përmbajë​​ dy elemente: pretendimet faktike dhe argumentet ligjore që​​ i mbështesin ato. Këto dy elemente janë​​ të​​ ndërlidhura njëra me tjetrën sepse faktet e prezantuara duhen parë​​ nën dritën e argumenteve dhe anasjelltas. Të​​ gjitha kërkesat duhet të​​ përmbajnë, ndër të​​ tjera, një​​ përmbledhje të​​ qartë​​ të​​ fakteve dhe shkeljeve të​​ pretenduara të​​ Kushtetutës dhe KEDNJ-së​​ dhe argumentet përkatëse. Mosrespektimi i këtyre elementeve të​​ kërkesës, mund të​​ rezultojë​​ në​​ mosshqyrtimin​​ e kërkesës nga Gjykata.​​ (rasti i GJEDNJ-së,​​ Rustavi 2 Broadcasting Company LTD dhe të​​ tjerët kundër Gjeorgjisë, nr. 16812/17, aktgjykim i 18 korrikut 2019, paragrafi 244).

• Gjykata përsërit se barra për të​​ ndërtuar, sqaruar dhe plotësuar kërkesën bie mbi parashtruesit e kërkesës, të​​ cilët kanë​​ interes të​​ drejtpërdrejtë​​ në​​ mënyrë​​ që​​ pretendimet e tyre të​​ adresohen në​​ mënyrë​​ efektive​​ nga Gjykata. Në​​ rastet kur parashtruesit e kërkesës nuk i përgjigjen kërkesës së​​ Gjykatës për qartësimin dhe plotësimin e kërkesës, Gjykata i deklaron këto kërkesa si të​​ paqarta dhe jo të​​ plota dhe nuk i shqyrton pretendimet e parashtruesve​​ të​​ kërkesës. (Rasti i Gjykatës,​​ KI08/22,​​ parashtrues​​ Bajram Santuri,​​ Vendim për refuzim të​​ kërkesës​​ i 6 korrikut 2022, paragrafët​​ 37-39;​​ KI134/18, parashtrues​​ Bajram Santuri, Vendim për​​ refuzimin e​​ kërkesës i 16 janarit 2019, paragrafi 36;​​ KI48/17, parashtrues​​ Slađana Radojković​​ Marinković, Vendim për refuzim të​​ kërkesës​​ i 14 nëntorit 2017, paragrafi 20-25).

• Gjykata vëren se në​​ rastin konkret, parashtruesi i kërkesës ka dorëzuar një​​ numër të​​ madh të​​ dokumenteve. Në​​ formularin e kërkesës parashtruesi i kërkesës ka shkruar se nuk konteston një​​ akt të​​ autoritetit publik por shumë​​ akte të​​ autoriteteve publike. Në​​ lidhje me kohën e nxjerrjes së​​ aktit publik që​​ e konteston, parashtruesi ka shkruar se​​ aktet​​ publike​​ janë​​ nxjerrë​​ nga viti 2000 deri në​​ vitin 2023.​​ 

• Gjykata vlerëson se parashtruesi i kërkesës​​ nuk ka paraqitur akte konkrete të​​ autoriteteve publike të​​ cilat i konteston dhe nuk ka përmbledhur në​​ mënyrë​​ të​​ qartë​​ faktet e rastit. Gjithashtu, parashtruesi i kërkesës nuk ka paraqitur pretendime për shkelje kushtetuese dhe as argumente ligjore që​​ do të​​ mbështesnin ato. Kërkesa e parashtruesit​​ është​​ kaotike, e​​ mbushur me dokumente të​​ cilat nuk kanë​​ lidhshmëri logjike njëra me tjetrën​​ dhe e ngjashme me kërkesat e tjera​​ të tij të paraqitura në Gjykatë.

• Gjykata thekson se i kishte bërë​​ kërkesë​​ parashtruesit të​​ kërkesës të​​ sqaronte kërkesën e tij, të​​ specifikonte aktin publik që​​ e konteston dhe t’i saktësonte të​​ drejtat kushtetuese që​​ pretendon se i janë​​ shkelur. Parashtruesi i kërkesës nuk e bëri një​​ gjë​​ të​​ tillë​​ edhe pas kërkesës së​​ Gjykatës. Përkundër që​​ dërgoi dokumente shtesë​​ në​​ gjykatë, në​​ kuptimin përmbajtësor nuk ndryshoi asgjë​​ kërkesa e tij.

• Gjykata konstaton se kërkesa e parashtruesit të​​ kërkesës​​ është​​ jo e plotë​​ dhe e paqartë. Rrjedhimisht, bazuar në​​ nenin 48 të​​ Ligjit dhe rregullit 54 (2) (a) vendos të​​ refuzojë​​ kërkesën.​​ ​​ 

PËR KËTO ARSYE

Gjykata Kushtetuese e Kosovës, në pajtim me nenin 113.7 të Kushtetutës, në nenin 48​​ të Ligjit dhe rregullin​​ 54 (2)​​ (a)​​ të Rregullores së punës, në seancën e mbajtur më​​ 30 prill 2024,​​ njëzëri

VENDOS

• TË REFUZOJË kërkesën​​ me procedurë të shkurtër;

• T'UA KUMTOJË këtë vendim palëve;

• TË PUBLIKOJË këtë vendim në Gazetën Zyrtare, në pajtim me nenin

20.4 të Ligjit;

• Ky vendim hyn​​ në fuqi në​​ momentin e publikimit​​ në Gazetën Zyrtare, në pajtim me paragrafin 5 të nenit 20 të Ligjit.​​ 

Gjyqtari​​ raportues   ​​  Kryetarja e Gjykatës Kushtetuese

Enver Peci  ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​​​ ​​   ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​​​  ​​ ​​​​ Gresa Caka-Nimani