Gjykata Kushtetuese

KI208/22, Parashtrues i kërkesës:  Flurentin Berisha, Vlerësim i kushtetutshmërisë së aktgjykimit të Gjykatës Themelore në Gjakovë [P. nr. 267/22] të 7 tetorit 2022

 KI208/22, Aktvendim për papranueshmëri i 12 prillit  2023, publikuar më 11 maj 2023

Fjalët kyç: kërkesa individuale, mosshterimi i mjeteve juridike

Thelbi i procedurës gjyqësore pranë gjykatës së rregullt në rastin konkret ka të bëjë me procedurën penale e cila është zhvilluar në Gjykatën Themelore për shkak të dyshimit të bazuar se parashtruesi i kërkesës ka kryer veprën penale ““Vjedhje e rëndë” nga neni 315 pika 1.1 e Kodit Penal të Kosovës”.

Gjatë procedurës gjyqësore, gjyqtari i Gjykatës Themelore e njoftoi parashtruesin e kërkesës për të drejtat e tij.

Gjatë seancës gjyqësore, parashtruesi i kërkesës u deklarua fajtor për kryerjen e veprës penale, duke deklaruar se do të mbrohet vet në procedurën penale.

Gjykata Themelore e shpalli parashtruesin e kërkesës fajtor për kryerjen e veprës penale dhe e dënoi atë me 12 muaj burgim.

Parashtruesi i kërkesës parashtroi kërkesë në Gjykatë duke deklaruar se gjatë procedurës gjyqësore nuk kishte të drejtë të mbrohej, gjë që cenon të drejtat e tij të garantuara me nenet 30 dhe 31 të Kushtetutës në lidhje me nenin 6 të KEDNJ-së.

Gjykata, duke shqyrtuar shkresat e lëndës, konstatoi se parashtruesi i kërkesës pas pranimit të aktgjykimit të Gjykatës Themelore kishte të drejtë të ankohej në Gjykatën e Apelit, gjë që nuk e bëri. Prandaj, Gjykata konkludoi se parashtruesi i kërkesës nuk i ka shteruar të gjitha mjetet e rregullta juridike në pajtim me nenin 113.7 të Kushtetutës, nenet 20 dhe 47 të Ligjit si dhe në pajtim me rregullin 39 (1) (b) të Rregullores së punës.