Gjykata Kushtetuese

KI81/22, Parashtruesi i kërkesës: Mursel Gashi, Kërkesë për vlerësim të kushtetutshmërisë së Aktvendimit të Kolegjit të Apelit të Dhomës së Posaçme të Gjykatës Supreme për çështje që lidhen me Agjencinë Kosovare të Privatizimit, AC-I-21-0855 të 27 janarit 2022

KI81/22, Aktvendim për papranueshmëri i 8 shtatorit 2022, publikuar më 18 tetor 2022

Fjalët kyçe: kërkesë individuale, procedurë kontestimore, qartazi e pabazuar

Parashtruesi i kërkesës e paraqet kërkesën në Gjykatë për herë të dytë. Kërkesën e parë parashtruesi e ka paraqitur më 17 korrik 2019, të cilën Gjykata e ka regjistruar me numër KI120/19. Në kërkesën KI120/19 parashtruesi ka kontestuar kushtetutshmërinë e aktvendimit [AC-I-17-0568] të Kolegjit të Apelit  të DHPGJS-së të datës 14 mars 2019. Në atë kërkesë, Gjykata konstatoi shkelje të nenit 31 [E drejta për një gjykim të drejtë dhe të paanshëm] të Kushtetutës në lidhje me nenin 6 (E drejta për një gjykim të drejtë) të KEDNJ-së, për mungesë të vendimit të arsyetuar gjyqësor. Më konkretisht, Gjykata shpalli të pavlefshme pikën V të aktvendimit [AC-I-17-0568] të Kolegjit të Apelit të DHPGJS-së të datës 14 mars 2019, dhe ktheu  Aktvendimin në rishqyrtim në Kolegjin e Apelit të DHPGJS-së, ekskluzivisht në lidhje me shqyrtimin e pikës V të dispozitivit të Aktvendimit të sipërpërmendur

Kolegji i Apelit i PKVS-së në procedurë të përsëritur ka analizuar pretendimet nga aktgjykimi KI 120/19, duke nxjerrë aktvendim të ri [AC-I-21-0855], me të cilin parashtruesi i kërkesës nuk ishte i kënaqur. Rrjedhimisht, ai i ka paraqitur Gjykatës një kërkesë të re, në të cilën fillimisht ka konsideruar se Kolegji i Apelit i DHPGJS-së, as në procedurat e përsëritura, nuk i ka trajtuar siç duhet të gjitha pretendimet nga Aktgjykimi KI 120/19.

Gjykata duke analizuar pretendimet e parashtruesit të kërkesës në kontekstin e aktvendimit të ri të Kolegjit të Apelit të DHPGJS-së, konstatoi se pretendimet e parashtruesit ishin të pabaza, dhe kjo për shkak se Gjykata arriti në përfundimin se Kolegji i Apelit i DHPGJS-së trajtoi të gjitha udhëzimet e Gjykatës nga Aktgjykimi KI120/19 në atë mënyrë që parashtruesit të kërkesës i është dhënë shpjegim për çështjen e së drejtës në kompensim, dhe i janë dhënë udhëzime procedurale se si ta realizojë këtë të drejtë në kompensim.

Kështu, sipas mendimit të Gjykatës, Kolegji i Apelit i DHPGJS-së në aktvendimin e vet [AC-I-21-0855], ka zbatuar plotësisht udhëzimet e Gjykatës nga Aktgjykimi KI120/19, duke dhënë një shpjegim ligjor për secilin prej tyre veç e veç, e që Gjykata në rrethanat e dhëna vlerëson se ato janë në përputhje me kërkesat e nenit 31 të Kushtetutës dhe nenit 6 të KEDNJ-së, në kuadër të vendimit të arsyetuar gjyqësor.