Gjykata Kushtetuese

Prishtinë, më 9 gusht​​ 2024

Nr. ref.: RK 2506/24

VENDIM PËR REFUZIM TË KËRKESËS

në

rastin nr. KI224/23

Parashtrues​​ 

Muhamet Asllani, si përfaqësues i pretenduar i U.A.

Kërkesë për vlerësimin e​​ kushtetutshmërisë​​ së​​ Aktgjykimit [C.​​ nr.​​ 129/03]​​ të​​ Gjykatës​​ Themelore në​​ Gjakovë,​​ të 25 korrikut 2014 ​​​​ 

GJYKATA KUSHTETUESE E REPUBLIKËS SË KOSOVËS

e​​ përbërë nga:

Gresa Caka-Nimani, kryetare

Bajram Ljatifi, zëvendëskryetar,

Selvete Gërxhaliu-Krasniqi, gjyqtare

Safet Hoxha, gjyqtar

Radomir Laban, gjyqtar

Remzije Istrefi-Peci, gjyqtare

Nexhmi Rexhepi, gjyqtar

Enver Peci, gjyqtar dhe

Jeton Bytyqi, gjyqtar

Parashtruesi i kërkesës

• Kërkesa është parashtruar nga​​ Muhamet Asllani, i cili pretendon se është përfaqësues i​​ U.​​ A.​​ me vendbanim​​ në​​ Gjakovë​​ (në tekstin e mëtejmë:​​ parashtruesi​​ i​​ kërkesës).

Vendimi i kontestuar​​ 

• Parashtruesi​​ i kërkesës konteston​​ kushtetutshmërinë​​ e​​ tejzgjatjes së​​ procedurës​​ gjyqësore​​ në​​ Gjykatën Themelore në​​ Gjakovë, përkitazi me lëndën [C.​​ nr.​​ 129/03].

Objekti i çështjes​​ 

• Objekt i çështjes së kërkesës është vlerësimi i kushtetutshmërisë së​​ tejzgjatjes së​​ procedurës gjyqësore, për të cilën​​ parashtruesi i kërkesës pretendon shkeljen e të drejtave të​​ tij të garantuara me nenin​​ 31​​ [E Drejta për Gjykim të Drejtë dhe të Paanshëm]​​ të Kushtetutës së​​ Republikës së Kosovës​​ (në tekstin e mëtejmë: Kushtetuta), në lidhje me nenin 6​​ (E drejta për një proces të rregullt)​​ të Konventës Evropiane për të Drejtat e​​ Njeriut​​ (në tekstin e mëtejmë:​​ KEDNJ).

Baza juridike​​ 

• Kërkesa bazohet në paragrafët 1 dhe 7 të nenit 113 [Juridiksioni dhe Palët e Autorizuara] të Kushtetutës, në nenet 22 [Procedimi i kërkesës] dhe 47 [Kërkesa individuale] të Ligjit për Gjykatën Kushtetuese të Republikës së Kosovës, nr. 03/L-121 (në tekstin e mëtejmë: Ligji) dhe në rregullin 25​​ [Parashtrimi i kërkesave dhe përgjigjeve] të Rregullores së punës së Gjykatës Kushtetuese (në tekstin e mëtejmë: Rregullorja e punës).

Procedura në Gjykatën Kushtetuese

• Më​​ 16 tetor​​ 2023, parashtruesi​​ i kërkesës dorëzoi​​ kërkesën​​ në Gjykatën Kushtetuese të Republikës së Kosovës (në tekstin e mëtejmë Gjykata).​​ 

• Më​​ 22 tetor​​ 2023, Kryetarja​​ e Gjykatës me Vendimin​​ nr.​​ GJR.​​ KI224/23 caktoi gjyqtarin​​ Nexhmi Rexhepi,​​ gjyqtar raportues dhe me Vendimin​​ KSH.​​ KI224/23 caktoi anëtarët e Kolegjit shqyrtues,​​ të​​ përbërë nga gjyqtarët:​​ Selvete Gërxhaliu-Krasniqi​​ (kryesuese),​​ Safet Hoxha​​ dhe​​ Remzije Istrefi-Peci​​ (anëtarë).

• Më​​ 25​​ tetor​​ 2023,​​ Gjykata njoftoi parashtruesin​​ e kërkesës për regjistrimin e kërkesës.​​ Gjykata​​ kërkoi​​ nga parashtruesi i​​ kërkesës​​ që, në cilësinë e përfaqësuesit​​ të​​ dorëzonte në​​ Gjykatë​​ autorizimin specifik për përfaqësim në Gjykatë, në afatin prej 15 (pesëmbëdhjetë) ditësh.

• Më 28 tetor 2023, parashtruesi i kërkesës e pranoi shkresën njoftuese të Gjykatës.​​ 

• Parashtruesi i kërkesës nuk dorëzoi në​​ Gjykatë​​ dokumentin e kërkuar brenda afatit të​​ përcaktuar.

• Më 11 mars 2024, gjyqtari Jeton Bytyqi dha betimin para Presidentes së Republikës së Kosovës, me​​ ç‘rast​​ filloi mandati i tij në Gjykatë.

• Më​​ 14 maj 2024, Gjykata​​ kërkoi​​ përsëri​​ nga​​ parashtruesi​​ i​​ kërkesës​​ të​​ dorëzonte​​ autorizimin specifik​​ që​​ dëshmonte​​ se ishte​​ përfaqësues​​ i autorizuar​​ i personit U.A.,​​ në​​ afatin prej 7 (shtatë)​​ ditësh.

• Më 19 qershor 2024, parashtruesi i kërkesës e dorëzoi në Gjykatë një dokument shtesë (autorizim të përgjithshëm).

• Më​​ 17 korrik​​ 2024,​​ Kolegji shqyrtues shqyrtoi raportin e gjyqtarit raportues dhe njëzëri i rekomandoi Gjykatës​​ refuzimin​​ e kërkesës.​​ 

Përmbledhja e fakteve

• Më​​ 22 prill​​ 1996, parashtruesi i kërkesës paraqiti në​​ Gjykatën Komunale​​ në​​ Gjakovë​​ (në​​ tekstin e mëtejmë: Gjykata Komunale)​​ kërkesëpadi për vërtetim të​​ pronësisë​​ kundër të​​ paditurve H.​​ A., S.​​ A., F.​​ A., G.​​ A.​​ dhe Komunës së​​ Gjakovës.​​ Parashtruesi i kërkesës pretendonte se​​ është​​ pronar i ngastrës kadastrale në​​ sipërfaqe prej 3-12-96 ha, dhe kërkonte nga të​​ paditurit që​​ pronën në​​ fjalë​​ ta bartnin​​ në​​ emrin e tij.

• Më​​ 11 tetor 2007, parashtruesi i kërkesës dorëzoi shkresë​​ në​​ Gjykatën Komunale, nëpërmjet së​​ cilës kërkonte që​​ kontesti të​​ trajtohej në​​ kohë​​ më​​ të​​ shpejtë.​​ 

• Më​​ 25 korrik 2014, Gjykata Themelore​​ nëpërmjet Aktgjykimit [C.​​ nr.​​ 129/03]​​ refuzoi kërkesëpadinë​​ e parashtruesit të​​ kërkesës si të​​ pathemeltë.​​ 

• Parashtruesi i kërkesës paraqiti ankesë​​ në​​ Gjykatën e Apelit, kundër aktgjykimit të​​ Gjykatës Themelore.​​ 

• Më​​ 25 nëntor 2019, Gjykata e Apelit nëpërmjet Aktvendimit [Ac.​​ nr.​​ 3201/2014]​​ e​​ aprovoi ankesën e parashtruesit të​​ kërkesës dhe ktheu​​ çështjen​​ në​​ rigjykim​​ në​​ Gjykatën Themelore.

Pretendimet e parashtruesit​​ të​​ kërkesës

• Parashtruesi i kërkesës thekson se procedura gjyqësore në​​ këtë​​ rast​​ është​​ tejzgjatur dhe​​ se​​ sipas tij, kjo​​ është​​ në​​ kundërshtim me të​​ drejtën për gjykim brenda afatit të​​ arsyeshëm kohor, të​​ garantuar nga neni 31 i Kushtetutës në​​ lidhje me nenin 6​​ të​​ KEDNJ-së.

Dispozitat relevante kushtetuese dhe ligjore​​ 

Kushtetuta e Republikës së Kosovës

Neni 31

​​ [E Drejta për Gjykim të Drejtë dhe të Paanshëm]

1. Çdokujt i garantohet mbrojtje e barabartë e të drejtave në procedurë para gjykatave, organeve të tjera shtetërore dhe bartësve të kompetencave publike.

[...]

Konventa Evropiane për të Drejtat e Njeriut

Neni 6

(E drejta për një proces të rregullt gjyqësor)

• Çdo person ka të drejtë që çështja e tij të dëgjohet drejtësisht, publikisht ​​ dhe ​​ brenda ​​ një ​​ afati ​​ të ​​ arsyeshëm ​​ nga ​​ një ​​ gjykatë ​​ e ​​ pavarur dhe e paanshme, e krijuar me ligj, e cila do të vendosë si për mosmarrëveshjet në lidhje me të drejtat dhe detyrimet e tij të natyrës civile, ashtu edhe për bazueshmërinë e çdo akuze penale në ngarkim të tij​​ [...].

Vlerësimi i pranueshmërisë së kërkesës

• Gjykata së pari vlerëson nëse parashtruesi​​ i​​ kërkesës i ka​​ përmbushur kriteret e pranueshmërisë, të përcaktuara në Kushtetutë dhe të parashikuara më tej në Ligj dhe në Rregullore të punës.​​ 

• Në këtë drejtim, Gjykata i referohet​​ nenit 113 [Juridiksioni dhe Palët e Autorizuara]​​ të​​ Kushtetutës, që përcakton:​​ 

Neni 113

[Juridiksioni dhe Palët e Autorizuara]

1. Gjykata Kushtetuese vendos vetëm për rastet e ngritura para gjykatës në mënyrë ligjore nga pala e autorizuar.

[...]

• Gjykata i referohet nenit 21 [Përfaqësimi] të​​ Ligjit për Gjykatën Kushtetuese, i cili parasheh:​​ 

“Palët gjatë​​ procesit para Gjykatës Kushtetuese përfaqësohen vet ose nga një​​ përfaqësues i autorizuar nga pala”.

• Gjykata i referohet rregullit​​ 25 dhe 54 të​​ Rregullores së​​ punës, që​​ parashohin si në​​ vijim:

Rregulli​​ 25

[Parashtrimi i​​ kërkesave​​ dhe​​ përgjigjeve]

[...]

(2) Kërkesa, po ashtu, duhet të përmbajë edhe:

​​ (c) autorizimin për përfaqësim;

Rregulli 54

[Hedhja poshtë dhe refuzimi i kërkesës]

[...]

(2)​​ Gjykata mund të​​ vendosë​​ ta refuzojë​​ një​​ kërkesë​​ me​​ procedurë​​ të​​ shkurtër në​​ qoftë​​ se:

(a) kërkesa​​ është​​ jo e plotë​​ ose e paqartë, përkundër kërkesës ose kërkesave nga Gjykata ndaj palës që​​ ta plotësojë​​ ose të​​ qartësojë​​ kërkesën;

• Gjykata thekson se​​ parashtruesi i kërkesës​​ pretendon që​​ është​​ përfaqësues​​ i autorizuar​​ i U.A.-së​​ dhe​​ kërkesën e ka dorëzuar​​ në​​ emër të​​ tij.​​ Në shkresat e lëndës, parashtruesi i kërkesës e ka bashkangjitur një autorizim të përgjithshëm të vitit 2006,​​ përmes​​ së​​ cilës​​ U.A., e autorizonte​​ parashtruesin e kërkesës ta përfaqësonte pranë Gjykatës Komunale në Gjakovë.​​ 

• Gjykata​​ kërkoi nga​​ parashtruesi i kërkesës​​ që​​ të​​ dorëzonte​​ autorizimin​​ specifik​​ që​​ dëshmon se ai​​ është​​ përfaqësues i​​ autorizuar i​​ U.A.-së​​ pranë Gjykatës​​ dhe kërkesën e ka dorëzuar në​​ emër të​​ tij.​​ Mirëpo, parashtruesi i kërkesës nuk e dorëzoi në Gjykatë autorizimin e kërkuar brenda afatit të përcaktuar prej 15 (pesëmbëdhjetë) ditësh.​​ 

• Gjykata​​ bëri​​ një​​ përsëritje​​ të​​ kërkesës​​ për​​ parashtruesin e​​ kërkesës​​ në​​ lidhje me​​ dorëzimin e autorizimit​​ specifik dhe ia dha​​ një​​ afat​​ shtesë​​ prej 7 (shtatë)​​ ditësh.​​ Mirëpo, as​​ në​​ herën​​ e​​ dytë​​ parashtruesi i​​ kërkesës​​ nuk e​​ dorëzoi​​ në​​ Gjykatë​​ autorizimin​​ specifik​​ por vetëm e ridërgoi autorizimin​​ e përgjithshëm​​ që gjendej në shkresat e lëndës.

• Gjykata thekson se kërkesat në​​ Gjykatë​​ mund të​​ dorëzohen personalisht nga palët apo nga përfaqësuesit e tyre. Në​​ rastin kur pala e dorëzon kërkesën nëpërmjet përfaqësuesit, kërkohet autorizimi i vlefshëm për përfaqësim në​​ Gjykatë​​ (shih,​​ rastet e Gjykatës,​​ KI07/16,​​ parashtrues Rifat Abdullahi, Vendim për refuzim të kërkesës​​ i 14 korrikut 2016, paragrafët. 20-23;​​ KI137/20,​​ parashtrues​​ Ali Latifi si përfaqësues i pretenduar i M.S., Vendim për refuzim të kërkesës i 11 nëntorit 2020, paragrafët. 21-22).

• Gjykata thekson se bazuar në​​ rregullin 25​​ (2) (c)​​ të​​ Rregullores së​​ punës, kërkesa ndër të​​ tjera duhet të​​ përmbajë​​ edhe autorizim për përfaqësim. Ndërkaq,​​ rregulli​​ 54 (2)​​ (a)​​ i Rregullores së​​ punës përcakton që​​ Gjykata mund të​​ vendosë​​ ta refuzojë​​ një​​ kërkesë​​ me​​ procedurë​​ të​​ shkurtër në​​ qoftë​​ se kërkesa​​ është​​ jo e plotë​​ ose e paqartë, përkundër kërkesës nga Gjykata ndaj palës që​​ ta plotësojë​​ atë.

• Gjykata konstaton se kërkesa e parashtruesit të​​ kërkesës refuzohet me procedurë​​ të​​ shkurtër për shkak se​​ është​​ jo e plotë, në​​ mungesë​​ të​​ autorizimit.​​ 

PËR KËTO ARSYE

Gjykata Kushtetuese, në pajtim me​​ paragrafin 1 të nenit 113​​ të Kushtetutës, me nenin 20 dhe 47 të Ligjit dhe me rregullin​​ 25​​ (2)​​ (c)​​ dhe​​ 54​​ (2)​​ (a) të Rregullores së punës, më​​ 17 korrik​​ 2024,​​ njëzëri

VENDOS​​ 

• TË​​ REFUZOJË​​ kërkesën;

• T’UA KUMTOJË këtë​​ vendim​​ palëve dhe, në pajtim me​​ paragrafin 4 të nenit​​ 20​​ të Ligjit, ta publikojë në Gazetën Zyrtare;

• Ky​​ vendim​​ hyn në fuqi në ditën e shpalljes në Gazetën Zyrtare të Republikës së Kosovës, në pajtim me paragrafin 5 të nenit 20 të Ligjit.

Gjyqtari raportues    ​​ ​​ ​​ ​​ ​​ ​​​​ Kryetarja e Gjykatës Kushtetuese​​ 

​​ Nexhmi Rexhepi ​​​​  ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​​​  ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​ ​​​​ Gresa Caka-Nimani