Gjykata Kushtetuese

KI65/20 dhe KI66/20, Parashtrues: Jovica Stanisavljević dhe Stojmirka Stanisavljević, Vlerësim i kushtetutshmërisë së Aktgjykimit të Kolegjit të Apelit të Dhomës së Posaçme të Gjykatës Supreme të Kosovës për çështjet që lidhen me Agjencinë Kosovare të Privatizimit AC-I-16-0101-A22 të 14 shkurtit 2020

KI65/20 dhe KI 66/20, aktvendim për papranueshmëri i 10 dhjetorit  2020, publikuar më 15 janar 2021

Fjalët kyç: kërkesë individuale, e drejta për gjykim të drejtë, aktvendim për papranueshmëri

Në bazë të shkresave të lëndës, rrjedh që të dy parashtruesit e kërkesës kanë punuar në ndërmarrjen shoqërore 14 Nëntori, e cila ishte privatizuar nga Agjencia Kosovare e Privatizimit.

Sipas pretendimeve, parashtruesit e kërkesave nuk e dinin se procedura e privatizimit të ndërmarrjes 17 Nëntori kishte filluar, dhe për këtë arsye, ata nuk ishin përfshirë në listën e punonjësve që ushtruan të drejtën për pjesën e 20% të privatizimit.

Parashtruesit e kërkesës parashtruan ankesë duke deklaruar në Kolegjin e Specializuar të DHPGJS-së se ata e kishin humbur afatin për të ushtruar ankesë kundër listës përfundimtare sepse nuk ishin njoftuar që procesi i privatizimit kishte filluar.

Kolegji i Specializuar i DHPGJS-së e refuzoi kërkesën duke deklaruar se ankesat ishin parashtruar pas 3 vjetësh, gjë që është në kundërshtim me rregulloren e UNMIK-ut.

Parashtruesit e kërkesës parashtruan ankesa në Kolegjin e Apelit të DHPGJS-së, duke pretenduar të njëjtat pretendime ankimore.

Kolegji i Apelit i DHPGJS-së refuzoi ankesat e të dy parashtrueseve të kërkesës, duke deklaruar se ankesat ishin paraqitur jashtë afatit.

Prandaj, parashtruesit e dorëzuan  kërkesën në Gjykatën Kushtetuese duke pretenduar që me vendimet e Kolegjit të Specializuar dhe Kolegjit të Apelit janë shkelur të drejtat dhe liritë e tyre të garantuara me nenin 24 [Barazia para Ligjit], nenin 31 [E Drejta për Gjykim të Drejtë dhe të Paanshëm] dhe nenin 49 [E Drejta e Punës dhe Ushtrimit të Profesionit] të Kushtetutës si dhe nenin 6 (E drejta për një proces të rregullt), nenin 14 (Ndalimi i diskriminimit) dhe neni 1 i Protokollit nr. 12 (Ndalimi i përgjithshëm i diskriminimit) të Konventës Evropiane për të Drejta të Njeriut.

Bazuar në shkresat e lëndës dhe bazuar në pretendimet e parashtruesve të kërkesës, Gjykata konkludoi se kërkesat janë qartazi të pabazuara në baza kushtetuese dhe duhet të deklarohen të papranueshme në pajtim me rregullin 39 (2) të Rregullores së punës.